ХЭРГИЙН ТАЛААР ХАРИЛЦАН ЭСРЭГ СОНИРХОЛТОЙ ШҮҮГДЭГЧ НАРЫН НЭГ НЬ ӨМГӨӨЛӨГЧТЭЙ ШҮҮХ ХУРАЛДААНД ОРОЛЦОХ БОЛ БУСАД ШҮҮГДЭГЧ НАРЫГ МӨН АДИЛ ӨМГӨӨЛӨГЧТЭЙ ШҮҮХ ХУРАЛДААНД ОРОЛЦУУЛНА.

Шүүхийн нэр: Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүх

Шийдвэрийн дугаар: 2025 оны 01 дүгээр сарын 29-ний өдрийн 2025/ШТ/51

Процессын тойм: № 2

Огноо: 2025.01.29-ний өдөр

Шийдвэрийн төлөв: Хүчин төгөлдөр болсон.

Санамж:

“Энэхүү тойм нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.”

      Нийслэлийн Прокурорын газрын хяналтын прокуророос Монгол Улсын Эрүүгийн хуулийн тусгай ангид заасан зохион байгуулалттай гэмт бүлэглэл байгуулах, хууль бусаар ашигт малтмал олборлох, мөнгө угаах, хахууль өгөх, хахууль авах гэмт хэргүүдэд нэр бүхий 18 шүүгдэгчид холбогдуулан яллах дүгнэлт үйлдэж хэргийг 2023 оны 11 дүгээр сарын 20-ны өдөр шүүхэд ирүүлсэн.

       Шүүх хуралдаанд оролцвол зохих ирцэд 2 улсын яллагч, 18 шүүгдэгч, 15 өмгөөлөгч болон гэрч шинжээч нар бүртгэгдсэн бөгөөд Эрүүгийн хэрэг хянан шийдвэрлэх тухай хуулийн 34.16 дугаар зүйлийн 1 дэх хэсэгт заасныг удирдлага болгон тодруулбал улсын яллагч, шүүгдэгч, өмгөөлөгч нар шүүх хуралдаанд ирээгүй үндэслэлээр шүүх хуралдааныг удаа дараа хойшлуулж шийдвэрлэсэн.

        2025 оны 01 дүгээр сарын 29-ний өдөр товлон зарлагдсан шүүх хуралдаан дээрх ирц бүрдсэн хэдий ч улсын яллагч нарын  зүгээс шүүгдэгч “О” өмгөөлөгчгүй буюу өөрөө өөрийгөө өмгөөлж шүүх хуралдаанд оролцож байгаа нь Эрүүгийн хэрэг хянан шийдвэрлэх тухай хуулийн 5.3 дугаар зүйлийн 1 дэх хэсгийн 1.5-д заасан “Хэргийн талаар харилцан эсрэг сонирхолтой шүүгдэгчийн нэг нь өмгөөлөгчтэй байгаа бол бусад шүүгдэгч оролцох эрүүгийн хэргийг өмгөөлөгчгүй явуулж болохгүй” гэх хуулийн шаардлагад үл нийцэх тул шүүгдэгч “О”-нь өмгөөлөгч авах хүртэл шүүх хуралдааныг хойшлуулах саналыг гаргав.

     Улсын яллагчийн дээрх саналын хүрээнд шүүгдэгч “О”-ын шүүх хуралдаанд өмгөөлөгчтэй оролцох тухай хүсэлт, эрүүгийн хэрэг хянан шийдвэрлэх тухай хуулийн зохицуулалтад нийцүүлэн шүүх хуралдааныг 2025 оны 02 дугаар сарын 17-ны өдрийн 13:00 цаг хүртэл хойшлуулж шийдвэрлэлээ.

Тоймыг бэлтгэсэн: Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхийн шүүгч: Ц.Эрдэнэчимэг