Үе үеийн ахмад шүүгчид, шүүхийн захиргааны ажилтнууд, шударга ёсыг сахин хамгаалах ариун үйлсэд хамтран зүтгэж буй хуулийн байгууллагын ажилтнууд, бидний ажил үйлсийг ойлгон дэмжиж ирсэн ард иргэддээ Хан-Уул дүүргийн Эрүүгийн хэргийн анхан шатны шүүхийн Ерөнхий шүүгч болон ажлын албаны хамт олны зүгээс мэнд дэвшүүлье.

БНМАУ-ын Ардын Их Хурлын Тэргүүлэгчдийн 1965 оны 4 дүгээр сарын 19-ний өдрийн 79 дүгээр зарлигаар Улаанбаатар хотыг 4 районд бүсчлэн хувааж, засаг захиргааны зохион байгуулалтыг өөрчилсний дагуу мөн оны 6 дугаар сарын 26-ны өдөр хуралдсан Ажилчны районы Ардын Депутатуудын хурлын анхдугаар чуулганаар Ажилчны районы ардын шүүхийг анх байгуулж байсан түүхтэй билээ.

Өдгөө Хан-Уул дүүргийн Эрүүгийн хэргийн анхан шатны шүүх нь 8 шүүгч, 8 шүүгчийн туслах, 1 мэдээлэл лавлагааны мэргэжилтэн, 4 шүүх хуралдааны нарийн бичгийн дарга, 1 жолооч, 1 мэдээлэл технологийн мэргэжилтэн нарын бүрэлдэхүүнтэйгээр Монгол Улсын Аж үйлдвэрийн тулгын чулууг тавьсан аж үйлдвэрийн томоохон бүс нутаг, Ажилчны районоос Хан-Уул дүүрэг болон нэршсэн, үндэсний томоохон компаниуд үйл ажиллагаа явуулдаг, аялал жуулчлал, гадаад харилцаа, боловсрол соёл, урлаг, спорт, эрүүл мэнд, эрчим хүч, авто зам, барилгын салбарууд хурдацтай хөгжиж байгаа, агаарын болон төмөр замын тээврийн дэд бүтэцтэй, худалдаа үйлчилгээ бүхий хөгжил дэвшилд тэмүүлэн өргөжиж буй дүүрэгт шүүн таслах ажиллагааг тасралтгүй, хэвийн явуулах чиг үүргийг хэрэгжүүлэн ажиллаж байна.

Монгол Улсын хүн амын дийлэнх хэсэг төвлөрөн суурьшсан, эдийн засаг, нийгэм, соёлын хөгжлийн тулгуур болсон хотод техник технологи хөгжих, амжилт бүтээл, өсөлт дэвшил нэмэгдэхийн зэрэгцээ хэрэг маргаан, зөрчил нэмэгдэж, түүнийг дагасан гомдол, хүсэлтүүд улам бүр өсөхийн хэрээр шүүхийн ачаалал нэмэгдсээр байгаа юм.

Хүний эрх, хууль ёсны ашиг сонирхлыг хамгаалах, зөрчигдсөн эрхийг сэргээх, хууль ёсыг сахиулах, буруу зөвийг ялган дэнсэлж нийгэмд тэгш байдал, шударга ёсыг сэргээн тогтоох чиг үүргээ шүүх хэрхэн биелүүлж байгаа нь тухайн нийгмийн хөгжил дэвшил, иргэдийн амар амгалан байдал, тайван амьдралд шууд нөлөөтэй болох нь өнөөгийн нийгэмд хүлээн зөвшөөрөгдөөд байгаа зүйл гэдэгтэй санал нийлэх биз ээ.

Одоогийн энэ түүхт цаг мөч хүртэл туулж ирсэн зам дардан байгаагүй боловч нийслэл хотын хэмжээнд шүүн таслах ажлыг хэвийн явуулах, тухайн цаг үеийн нийгмийн шаардлагад нийцүүлэн хууль сахиулах ажлыг хэрэгжүүлэх, шүүхийн боловсон хүчин, зохион байгуулалтыг бэхжүүлэх, эрх зүйн болон шүүхийн шинэтгэлийг бодит амьдралд хэрэгжүүлэх зэрэг ажилд тус дүүргийн шүүхийн ажилтнууд хувь нэмрээ оруулан ажилласаар байгааг дурдах нь зүйтэй. Мөн цаашдаа шүүн таслах ажиллагааг хэвийн явуулах, ард иргэдийн шүүхэд итгэх итгэлийг улам бүр дээшлүүлж, шударга ёсыг сахин хамгаалах, зөв шийдвэр гаргахын төлөө шүүхийн ажилтнууд шамдан ажиллахаа илэрхийлэхдээ таатай байна.

Шүүхийн ажлыг иргэд хэрхэн үнэлж дүгнэх нь олон нийтийн итгэлээс гадна шүүхийн ажилтнууд, түүний дотор шүүгчийн мэдлэг боловсрол, хүнлэг чанар, төвийг сахьсан, зарчимч байдал, сэтгэлийн хат, хөдөлмөрч чанараас хамаарах учраас нийт шүүгч, шүүхийн ажилтнууд, тэдгээрийн ар гэрийнхэнд оюуны мэлмий нь тунгалаг байх, ажлын өндөр амжилт, аз жаргалыг хүсэн ерөөж, шударга үнэний дэнс алдаагүй, цэх байхын ерөөлийг өргөн дэвшүүлье.

ЕРӨНХИЙ ШҮҮГЧ Б.БАТБОЛОР