Туршилтаар:

Г.МӨНХДӨЛ, Д.ДАГВАДОРЖ, ШИ ШАО ХУА НАРТ ХОЛБОГДОХ ХЭРЭГТ ЯЛЛАГДАГЧААР ЦАГДАН ХОРИХ ТАСЛАН СЭРГИЙЛЭХ АРГА ХЭМЖЭЭ АВСАН ШҮҮГЧИЙН ЗАХИРАМЖИЙГ ХҮЧИНГҮЙ БОЛГОСОН ТУХАЙ

            Шийдвэрийн дугаар: 2023/ЕШЗ/08, 2023/ЕШЗ/09, 2023/ЕШЗ/10

            Шийдвэрийн төлөв: Хүчин төгөлдөр

            Шийдвэрийн хураангуй: №6 2022.12.23

         Нүүрсний гэх тодотголтой хэрэгт “МБМ транс” ХХК-ийн гүйцэтгэх захирал Г.Мөнхдөл, “Таван толгой Транс” ХХК-ийн гүйцэтгэх захирал Д.Дагвадорж, “Зун Мен” ХХК-ийн гүйцэтгэх захирал БНХАУ-ын иргэн Ши Шао Хуа нарыг цагдан хорьсон шүүгчийн 2022 оны 12 дугаар сарын 16-ны өдрийн захирамжийг эс зөвшөөрч яллагдагч нарын өмгөөлөгч нарын гаргасан гомдлыг 2022 оны 12 дугаар сарын 23-ны өдөр хянан хэлэлцээд шүүгчийн захирамжийг хүчингүй болгож шийдвэрлэв.

        Учир нь Нийслэлийн прокурорын газраас “МБМ транс” ХХК-ийн гүйцэтгэх захирал Г.Мөнхдөл, “Таван толгой Транс” ХХК-ийн гүйцэтгэх захирал Д.Дагвадорж, “Зун Мен” ХХК-ийн гүйцэтгэх захирал БНХАУ-ын иргэн Ши Шао Хуа нарыг Эрүүгийн хуулийн ерөнхий ангийн 2.2 дугаар зүйлийн 3 дахь хэсэгт заасныг журамлан мөн хуулийн тусгай ангийн 17.1 дүгээр зүйлийн 2 дахь хэсгийн 2.3 дахь заалтад заасан /Бусдын эд хөрөнгийг хүч хэрэглэхгүйгээр, нууцаар, хууль бусаар авсан гэмт хэргийг их хэмжээний эд хөрөнгийг хулгайлж үйлдсэн/ гэмт хэрэгт холбогдуулан тус тус яллагдагчаар татан, Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.3 дахь заалтад заасан “гэмт хэрэг үйлдэж болзошгүй талаар үндэслэл бүхий баримт, мэдээлэл байгаа” гэсэн үндэслэлээр цагдан хорих таслан сэргийлэх арга хэмжээ авах саналыг Хан-Уул дүүргийн Эрүүгийн хэргийн анхан шатны шүүхэд гаргасныг үндэслэлтэй гэж яллагдагч нарт цагдан хорих таслан сэргийлэх арга хэмжээ тус тус авсан байна.

             Хуралдаанд талуудаас гаргасан гомдол, тайлбарын хүрээнд хэрэгт авагдсан баримтуудаас үзэхэд “Таван толгой” ХХК-с хууль бусаар нүүрс хулгайлсан байж болзошгүй гэх хэрэг Өмнөговь аймгийн нутаг дэвсгэрт үйлдэгдсэн үйл баримт авагдсан байдаг.

        Харин тус хэрэгт яллагдагч нарын эзэмшлийн компаниудын үйл ажиллагаа явуулж буй нутаг дэвсгэрт буюу Хан-Уул, Сүхбаатар дүүргүүдэд хэрэг бүртгэлт, мөрдөн байцаалтыг Эрүүгийн цагдаагийн албаны Эдийн засгийн гэмт хэрэгтэй тэмцэх хэлтэс явуулсан байна.

          Эрүүгийн хэрэг хянан шийдвэрлэх тухай хуулийн 2.3 дугаар зүйлийн 3 дахь хэсэгт “Хэрэг бүртгэлт, мөрдөн байцаалт явуулах хэд хэдэн байгууллагын эрх хэмжээнд харьяалагдах гэмт хэрэгт хэрэг бүртгэлт, мөрдөн байцаалт явуулах харьяаллыг прокурор тогтооно” гэж заасан.

          Өөрөөр хэлбэл хулгайлах гэмт хэрэг үйлдэгдсэн байж болзошгүй дээрх хэрэгт гэмт хэрэг үйлдэгдсэн газар, хэрэг бүртгэлт, мөрдөн байцаалт явуулсан газар, мөрдөн байцаалт явуулах байгууллагууд харьяаллын хувьд маргаантай дээрх нөхцөл байдалд хэрэг бүртгэлт, мөрдөн байцаалт явуулах харьяаллыг заавал нэг мөр болгон тогтоох шаардлагатай.

      Хэдийгээр Цагдаагийн Ерөнхий газрын Эрүүгийн цагдаагийн албаны даргын ажлын хэсгийн бүрэлдэхүүн томилох тухай тушаалаар Эрүүгийн цагдаагийн албаны Эдийн засгийн гэмт хэрэгтэй тэмцэх газрын дарга, албан хаагч нарыг томилсон байх боловч Эрүүгийн цагдаагийн албаны Эдийн засгийн гэмт хэрэгтэй тэмцэх газар нь нутаг дэвсгэрийн харьяаллын дагуу Чингэлтэй дүүрэгт хамаарна.

          Гэтэл хэрэгт хэрэг бүртгэлт, мөрдөн байцаалт явуулах харьяалал тогтоосон прокурорын шийдвэр огт авагдаагүй, аль нутаг дэвсгэрийн харьяаллаар мөдрөн шалгах ажиллагаа явуулах эсэх нь тодорхойгүй, дээрх ажиллагааг явуулсан байгууллага нь нутаг дэвсгэрийн харьяаллын дагуу ажиллагаа хийсэн нь тогтоогдохгүй байх тул Нийслэлийн прокурорын газраас яллагдагч нарт цагдан хорих таслан сэргийлэх арга хэмжээ авахуулахаар ирүүлсэн саналыг тус шүүх шийдвэрлэх үндэслэлгүй буюу харьяалал зөрчигдсөн гэж дүгнэн яллагдагч нарт цагдан хорих таслан сэргийлэх арга хэмжээ авсан шүүгчийн захирамжийг хүчингүй болгож шийдвэрлэв.

Хураангуйг бэлтгэсэн: Хан-Уул дүүргийн Эрүүгийн хэргийн анхан шатны шүүхийн Ерөнхий

                                                                                                                                 шүүгч Б.Батболор