Туршилтаар

“ТҮРЭЭСИЙН ОРОН СУУЦАНД ОРУУЛЖ ӨГНӨ” ГЭЖ БУСДЫГ ЗАЛИЛСАН ЭТГЭЭДИЙГ ХОРИХ ЯЛААР ШИЙТГЭВ

           Шийдвэрийн дугаар: 2021/ШЦТ/219                                                                                                                  Шийдвэрийн төлөв: Хүчин төгөлдөр болсон.                                                                                                    Шийдвэрийн хураангуй: №3 2022.09.20 

        Иргэн Амар нь өөрийгөө “Төрийн орон сууцны корпорац” ТӨҮГ-т ажилладаг бөгөөд “Буянт-Ухаа-2 дугаар хорооллын түрээсийн орон сууцанд хамруулж өгнө” гэж нэр бүхий 5 иргэнээс нийт 24 сая төгрөгийг өөрийн дансанд шилжүүлэн авсан хэдий ч түрээсийн орон сууцанд оруулж өгөөгүй мөн дээрх иргэдэд мөнгийг нь буцааж өгөлгүй хувийн хэрэгцээндээ ашигласан байна.

       Шүүхээс Амарын дээрх үйлдлийг Эрүүгийн хуульд заасан залилах гэмт хэргийн шинжийг хангасан байна гэж үзэн гэм буруутайд тооцож, түүнд 01 жил 10 сарын хугацаагаар хорих ял шийтгэжээ.

       Эрүүгийн хуулиар “Залилах гэмт хэрэг” гэдгийг бусдын эд хөрөнгө, эд хөрөнгийн эрхийг хуурч мэхлэх, итгэл эвдэх аргаар шууд өөрийн мэдэлд авах, буцааж өгөхгүй, хариу төлбөр огт хийхгүй гэсэн санаа зорилготой, бодит байдлыг гуйвуулах, зохиомол байдал бий болгон худал хэлэх, хуурамч мэдээллээр төөрөгдүүлэх, цахим хэрэгсэл ашиглах, худал амлах, урьдын харилцааны явцад бий болсон итгэлийг ашиглах зэргээр бусдын эд хөрөнгийг эзэмших, өмчлөх эрхийг өөртөө шилжүүлэн авах үйлдлийг ойлгохоор заасан байдаг.

      Энэ тохиолдолд иргэн Амар нь “ТОСК”-д ямар нэгэн албан тушаалд ажил эрхэлдэггүй бөгөөд бодит байдал дээр ийнхүү түрээсийн орон сууцанд иргэдийг хамруулах эрхгүй байсан хэдий ч иргэдийг хуурч мэхлэн, өөрийн данс руу нийт 24.000.000 төгрөг шилжүүлэн авсан, иргэдийн мөнгийг буцааж өгөлгүй цааш хувийн хэрэгцээндээ зарцуулсан нь нотлох баримтаар тогтоогдсон тул шүүх түүнийг залилах гэмт хэрэг үйлдсэн гэж үзжээ.

       Залилах гэмт хэрэг үйлдсэн хүнд торгох, нийтэд тустай ажил хийлгэх, зорчих эрхийг хязгаарлах, хорих гэсэн ялаас шүүх сонгож ял шийтгэхээр Эрүүгийн хуульд заасан бөгөөд шүүхээс  иргэдэд учруулсан хохирлоо нөхөн төлөөгүй байдлыг харгалзан Амарт хорих ял оногдуулж шийдвэрлэсэн байна.

      Харин нэр бүхий 5 хохирогч шүүх хуралдаанд 24 сая төгрөгөө нэхэмжилсэн бөгөөд шүүхээс уг хохирлыг гэмт хэргийн улмаас учирсан шууд хохирол гэж үзэн шүүгдэгч Амараас гаргуулж, хохирогч нарт олгохоор шийдвэрлэжээ.

       Шийтгэх тогтоолыг бүтнээр нь үзэх бол:  https://shuukh.mn/single_case/55379?daterange=2021-04-05%20-%202021-04-05&id=1&court_cat=2&bb=1

       Хураангуйг бэлтгэсэн: Хан-Уул дүүргийн Эрүүгийн хэргийн анхан шатны шүүхийн Ерөнхий                                                                                                                                                    шүүгч Б.Батболор