Шийдвэрийн огноо: 2019 оны 02 дугаар сарын 26

Шийдвэрийн дугаар: 2019/ШЦТ/160

Шийдвэрийн төлөв: Хүчин төгөлдөр болсон.

Тоймын дугаар: 05

Санамж: Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

        Иргэн Б.Галаа 2018 оны 08 дугаар сарын 10-ны өдөр Хан-Уул дүүргийн 10 дугаар хорооны нутаг дэвсгэрт байрлах Буянт-Ухаа агаарын замын хилийн боомтоор Ганаа овогтой Батсуурь гэх нэртэй Е09935 дугаартай гадаад паспортыг ашиглан зохих зөвшөөрөлгүйгээр Монгол улсын хилийг хууль бусаар нэвтэрсэн байна.

        Шүүхээс Б.Галаагийн дээрх үйлдлийг Эрүүгийн хуулийн тусгай ангид заасан Монгол Улсын хилийг хууль бусаар нэвтэрсэн байна гэж үзэн гэм буруутайд тооцож, торгуулийн ял шийтгэжээ.

       Эрүүгийн хуулиар “Монгол Улсын хилийг хууль бусаар нэвтрэх” гэдгийг Монгол Улсад орох, гарах хил нэвтрэх эрхийн баримт бичиггүйгээр, эсхүл хуурамч баримт бичгээр, эсхүл зохих зөвшөөрөлгүйгээр Монгол Улсын хилийг нэвтэрсэн үйлдлийг ойлгохоор заасан байдаг.

       Энэ тохиолдолд иргэн Б.Галаа 2016 оны 04 дүгээр сард өөрийн бичиг баримтаар Монгол Улсын хилийг нэвтэрч Швед улсад зорчиж, 2 жил 4 сарын хугацаанд ажиллаж, амьдарсан. Б.Галаа нь Швед улсад ажиллаж, амьдарч байхдаа Швед улсад ажиллаж амьдрах зөвшөөрлийг сунгуулаагүйн дээр бичиг баримтаа гээгдүүлсэн байна. Тэрээр гээгдүүлсэн, үрэгдүүлсэн өөрийн бичиг баримтыг болон Швед улсад ажиллаж, амьдрах зөвшөөрлийг өөрийн нэр дээр хууль журмын дагуу авалгүйгээр хууль бусаар амьдарч байгаад 2018 онд буцаад Монгол Улс руу явахдаа Швед улсад амьдарч байсан үл таних Монгол Улсын иргэнээс бусдын буюу Ганаа овогтой Батсуурь гэх нэртэй Е09935 дугаартай гадаад паспортыг худалдаж аваад тухайн бичиг баримтаар Монгол Улсын хилээр нэвтэрч, Монгол Улсын хилээр орж ирэх явцад баригдсан нь нотлох баримтаар тогтоогдсон тул шүүх түүнийг “Монгол Улсын хилийг хууль бусаар нэвтрэх” гэмт хэрэг үйлдсэн гэж үзжээ.

       Иргэн Ганаа овогтой Батсуурь нь 2012 онд Швед улс руу явсан бөгөөд өөрийн бичиг баримтыг алга болсныг мэдээгүй, хаана байгаагаа мэдэхгүй талаараа өөрийн төрсөн эгчид мэдэгдсэн байсан.

      “Монгол Улсын хилийг хууль бусаар нэвтрэх” гэмт хэрэг үйлдсэн хүнд торгох, зорчих эрхийг хязгаарлах, хорих гэсэн ялаас шүүх сонгож ял шийтгэхдээ Эрүүгийн хуульд заасан бөгөөд шүүхээс Б.Галааг тохиолдлын шинжтэй нөхцөл байдлын улмаас анх удаа хөнгөн гэмт хэрэгт холбогдсон, гэмт хэрэг үйлдсэн гэм буруугаа хүлээн зөвшөөрч, хэргийн үйл баримт болоод гэм буруугийн талаар маргаагүй, түүний хувийн байдлыг харгалзан Б.Галаад торгуулийн ял оногдуулж шийдвэрлэсэн байна.

Тус шийдвэрийг бүрэн эхээр нь:

https://shuukh.mn/single_case/29039?daterange=2019-01-01%20-%202019-10-01&id=1&court_cat=2&bb=1 линкээр үзэх боломжтой.

Хураангуйг бэлтгэсэн: Хан-Уул дүүргийн Эрүүгийн хэргийн анхан шатны шүүхийн шүүгч Д.Алтанжигүүр.