Хэргийг прокурорт буцаав.

2023/02/16 387
Хэргийг прокурорт буцаав.

 

Хэргийг прокурорт буцаав.

 

Шийдвэрийн дугаар: 2022.10.28-2022/ШЗ/1852

Шийдвэрийн төлөв: Хүчин төгөлдөр болсон

Процессын тойм–03

Санамж: Энэхүү мэдээлэл нь бүрэн гүйцэд шүүхийн шийдвэр биш бөгөөд түүнийг орлохгүй, харин шүүхийн шийдвэрийг олон нийтэд нээлттэй байдлаар мэдээлэн хүргэх зорилготой болно.

           Хан-Уул дүүргийн Прокурорын газраас Ц-г Эрүүгийн хуулийн тусгай ангийн 11.1 дүгээр зүйлийн 1 дэх хэсэгт заасан хүний эрүүл мэндэд хүнд хохирол санаатай учруулсан яллах дүгнэлт үйлдэж, хэргийг хялбаршуулсан журмаар шийдвэрлүүлэхээр Ц-д 11.000 нэгжтэй тэнцэх хэмжээний буюу 11.000.000 төгрөгөөр торгох ял оногдуулахаар тохиролцож, хэргийг Хан-Уул дүүргийн Эрүүгийн хэргийн анхан шатны шүүхэд шилжүүлжээ.

            Шүүхээс Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 4 дэх хэсгийн 4.1, 4.2, 4.5 дахь заасан нөхцөл байдал хангагдаагүй гэж үзэж Ц-д холбогдох эрүүгийн хэргийг прокурорт буцаасан байна.

            Нэг: Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 4 дэх хэсгийн 4.1 дэх хэсэгт заасан “шүүгдэгч гэмт хэрэг үйлдсэн нь нотлох баримтаар нотлогдсон эсэх”-ийг бүрэн шалгаж тогтоогоогүй.

              Хэрэгт авагдсан шүүхийн хэлэлцүүлэгт шинжлэн судалсан баримтаар: шүүгдэгч Ц, хохирогч Д нар нь 2016 оноос хамтын амьдралтай, дундаас төрсөн хүүхэдтэй хамтран амьдрагч байна.

              Хохирогч Д нь шүүгдэгч Ц-д удаа дараа зодуулж, хүчирхийлэлд байсан талаараа мөрдөн байцаалт болон шүүхийн хэлэлцүүлэгт мэдүүлжээ. Дээрх нөхцөл байдлаас үзэхэд: шүүгдэгч Ц нь хамтран амьдрагч Д-г байнга зодсон үйлдэл нь Эрүүгийн хуулийн тусгай ангийн 11.7 дугаар зүйлд заасан “гэр бүлийн хүчирхийлэл үйлдэх” гэмт хэрэг, мөн хохирогч Д-ийн эрүүл мэндэд “хүнд” гэмтэл учруулсан үйлдэл нь Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.1-д заасан “хүний эрүүл мэндэд хүнд хохирол санаатай учруулах гэмт хэргийг гэр бүлийн хүчирхийлэл үйлдэж” гэх хүндрүүлэх нөхцөл байдалтайгаар үйлдсэн байхад мөрдөн байцаалтын шатанд Ц-гийн үйлдлийг бүрэн шалгаагүй, прокуророос Ц-д холбогдох хэргийн зүйлчлэлийг зөв тогтоож чадаагүй байна.

         Хоёр: Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 4 дэх хэсгийн 4.2-д заасан “яллагдагч нь гэмт хэрэг үйлдсэн гэм буруугаа сайн дураараа хүлээн зөвшөөрсөн эсэх” нөхцөл байдал хангагдаагүй.

Ц нь мөрдөн байцаалтад. “... хохирогч Д “эгчийнхээ гэр рүү явлаа” гээд гарч ирэхээр нь би “харанхуй шөнө болсон байна, би хүргээд өгье” гэхэд миний хажуугаар яаран сандран гүйж шатны уруу унасан” гэж мэдүүлсэн байхад прокуророос шүүгдэгч Ц-г  гэмт хэрэг үйлдсэн гэм буруугаа сайн дураар хүлээн зөвшөөрсөн гэж дүгнэсэн нь үндэслэлгүй болжээ.

            Гурав:  Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 4 дэх хэсгийн 4.5-д заасан “гэмт хэргийн улмаас учруулсан хохирол, хор уршгийг нөхөн төлсөн...” гэх нөхцөл байдал хангагдаагүй талаар:

             Хохирогч Д-ийн  биед “баруун зулай яс, чамархай яс, хөхлөг сэртэн, гадна чихний суваг, баруун суурь ясны их далавч, суурийн хөндийг дайрсан хугарал, зүүн чамархайн дэлбэнгийн тархины эдэд няцрал, зүүн чамархайн аалзан хальс доор цус харвалт, баруун зулай, чамархайн хуйханд зөөлөн эдийн няцрал, баруун бугалга, баруун гуянд цус хуралт гэмтэл” бүхий хүнд зэргийн гэмтэл учирсан болох нь шинжээчийн дүгнэлтээр тогтоогдсон байна.

               Хохирогч Д нь дээрх хүнд гэмтлийн улмаас нүүрэнд саажилт үүссэн, нэг нүдний зовхи анивчлахгүй, инээж чадахгүй болсон тул эмчилгээ хийлгэж байгаа талаараа мэдүүлж холбогдох баримтыг гаргаж өгчээ. Гэтэл шүүгдэгч Ц нь хохирогч Д-д хохирол төлбөр төлж барагдуулаагүй байна.

         Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 4 дэх хэсгийн 4.1, 4.2, 4.5-д заасан нөхцөл байдал хангагдаагүй тул Эрүүгийн хэрэг хянан шийдвэрлэх тухай хуулийн 17.4 дүгээр зүйлийн 6 дахь хэсэгт “...Шүүгдэгч хүсэлтээсээ татгалзсан, эсхүл энэ зүйлийн 4 дэх хэсэгт заасан нөхцөл байдлын аль нэг нь хангагдаагүй гэж үзэх үндэслэл байвал шүүх хэргийг прокурорт буцаах шийдвэр гаргана...” гэж заасны дагуу шүүгдэгч Ц-д  холбогдох хэргийг прокурорт буцаасан байна.

 Хураангуйг бэлтгэсэн: Хан-Уул дүүргийн Эрүүгийн хэргийн анхан шатны шүүхийн Шүүгч Х.Одбаяр.

 

 

Сэтгэгдэл бичих:

Нэмэх