Шүүгдэгч нь “Найзын бэлэглэсэн цамцны халаасанд сэтгэцэд нөлөөт бодис байсныг мэдээгүй” гэж мэдүүлэв.

Шийдвэрийн дугаар: 2022.02.23-2022/ШЦТ/120

Шийдвэрийн төлөв: Хүчин төгөлдөр болсон

Шийдвэрийн тойм – 03

Санамж: Энэхүү мэдээлэл нь бүрэн гүйцэд шүүхийн шийдвэр биш бөгөөд түүнийг орлохгүй, харин шүүхийн шийдвэрийг олон нийтэд нээлттэй байдлаар мэдээлэн хүргэх зорилготой болно.

           Нийслэлийн Прокурорын газраас С.М-ыг Америкийн Нэгдсэн Улсаас шуудан илгээмж ашиглан Нэгдсэн Үндэстний Байгууллагын 1971 оны “Сэтгэцэд нөлөөт бодисын тухай” конвенцын 2 дугаар жагсаалтад багтсан, хориглосон дельта-9 тетрагидроканнабинол /delta 9 tetrahydrocannabinol/-ын агууламжтай 6 см урттай, 1 см өргөнтэй хоёр талдаа төмөртэй, тосорхог шаргал өнгийн,  6 ширхэг хуванцар сав бүхий сэтгэцэд нөлөөт бодисыг илгээж, Монгол Улсын хилээр нэвтрүүлсэн буюу Эрүүгийн хуулийн тусгай ангийн 20.7 дугаар зүйлийн 3 дахь хэсгийн 3.3-д заасан хориглосон сэтгэцэд нөлөөт бодисыг улсын хилээр нэвтрүүлсэн гэмт хэрэгт холбогдуулан яллах дүгнэлт үйлдэж хэргийг шүүхэд шилжүүлжээ.

           Хан-Уул дүүргийн Эрүүгийн хэргийн анхан шатны шүүх уг хэргийг хянан хэлэлцээд, хэрэгт цугларсан нотлох баримтаар С.М нь 2021 оны 03 дугаар сарын 13-ны өдөр 22 цагийн орчимд Америкийн Нэгдсэн Улсын Калифорни мужид шуудан илгээмжийн үйл ажиллагаа явуулдаг “Бид Монгол” ХХК-ийн салбарт илгээмжийг өөрөө хүлээлгэн өгч, үйлчилгээний нөхцөлтэй танилцаж баталгаажуулсан ба Нэгдсэн Үндэстний Байгууллагын 1971 оны “Сэтгэцэд нөлөөт бодисын тухай” конвенцын 2 дугаар жагсаалтад багтсан, хориглосон дельта-9 тетрагидроканнабинол /delta 9 tetrahydrocannabinol/-ын агууламжтай 6 см урттай, 1 см өргөнтэй хоёр талдаа төмөртэй, тосорхог шаргал өнгийн,  6 ширхэг хуванцар сав бүхий сэтгэцэд нөлөөт бодисыг илгээж, Монгол Улсын хилээр нэвтрүүлэн 2021 оны 8 дугаар сарын 09-ний өдөр Хан-Уул дүүргийн 2 дугаар хорооны нутаг дэвсгэрт байрлах “Бид Монгол" ХХК-аас хүлээн авсан ба Эрүүгийн хуулийн тусгай ангийн 20.7 дугаар зүйлийн 3 дахь хэсгийн 3.3-д заасан хориглосон сэтгэцэд нөлөөт бодисыг улсын хилээр нэвтрүүлсэн гэмт хэрэг үйлдсэн нь тогтоогдсон, гэм буруутай гэж үзэв. Тодруулбал,

         Шүүгдэгч С.М нь “илгээмжид байсан цамцыг түүний найз Америкийн Нэгдсэн Улсын иргэн Tommy Mack Jr гэх хүн бэлэглэсэн. Уг цамцны халаасанд “бодис байсныг мэдээгүй” гэж тайлбарласан.

        Шуудангийн тухай хуулийн 17 дугаар зүйлийн 17.2.1-д үйлчлүүлэгч буюу илгээгч  нь илгээж байгаа зүйлийнхээ талаар үнэн зөв мэдээлэл өгөх үүрэгтэй, мөн хуулийн 24 дүгээр зүйлийн 24.1.3-д Мансууруулах эм, сэтгэцэд нөлөөт бодисын эргэлтэд хяналт тавих тухай хуулийн 3.1.1, 3.1.4-т заасан мансууруулах эм, сэтгэцэд нөлөөт бодис, түүний түүхий эдийг шуудангаар илгээхийг хориглоно” гэж заажээ. Иймд шүүгдэгч С.М-ын “цамцны халаасанд бодис байсныг мэдээгүй” гэх тайлбар нь түүний гэм бурууг үгүйсгэж, цагаатгах үндэслэл болохгүй гэж дүгнэлээ.

        Шүүгдэгч С.М Монгол Улсын хилээр нэвтрүүлсэн савны хамт 9.8509 грамм жинтэй, 6 ширхэг сав бүхий бодис нь Нэгдсэн Үндэстний байгууллагын 1971 оны “Сэтгэцэд нөлөөлөх бодисын тухай конвенц”-ын 2 дугаар жагсаалтад багтдаг Дельта-9 тетрагидроканнабинол /delta 9 tetrahydrocannabinol/ агууламжтай болохыг Шүүхийн шинжилгээний үндэсний хүрээлэнгийн Тусгай шинжилгээний газрын химийн шинжээчийн 2021 оны 8 дугаар сарын 24-ний өдрийн 3642 дугаартай дүгнэлтээр тогтоожээ.

         Шүүх хавтаст хэрэгт авагдсан баримтууд болон хэргийн үйл баримтад дүгнэлт хийн шүүгдэгчийг гэмт хэрэг үйлдсэн гэм буруутайд тооцож, шүүгдэгч С.М нь анх удаа ял шийтгэгдэж байгаа хувийн байдлыг харгалзан 5 жил 6 сарын хугацаагаар хорих ял оногдуулж, нээлттэй хорих байгууллагад эдлүүлэхээр шийдвэрлэв.

Шийдвэрийг бүрэн эхээр нь үзэх холбоос:

https://shuukh.mn/single_case/64194?daterange=2022-01-01%20-%202023-02-15&id=1&court_cat=2&bb=1

Хураангуйг бэлтгэсэн: Хан-Уул дүүргийн Эрүүгийн хэргийн анхан шатны шүүхийн  шүүгч Х.Одбаяр

.