Хэргийн бодит байдлыг тогтоох нь мөрдөгч, прокурорын үүрэг

2023/06/02 474

Хэргийн бодит байдлыг тогтоох нь мөрдөгч,

прокурорын үүрэг

 

Шийдвэрийн дугаар: Баянгол дүүргийн Эрүүгийн хэргийн анхан шатны шүүхийн 2023 оны 5 дугаар сарын 24-ний өдрийн 879 дугаартай шүүгчийн захирамж.

Шийдвэрийн төлөв: Хүчин төгөлдөр болоогүй.

Процессын хураангуй дугаар №2023/7

Санамж: Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

Эрүүгийн хуулийн тусгай ангид заасан нийгэмд аюултай гэм буруутай үйлдэл, эс үйлдэхүйг гэмт хэрэгт тооцдог.

          Харин хэргийн бодит байдлыг нотлохын тулд мөрдөгч, прокурор хуульд заасан бүх арга хэмжээг авч яллагдагч, шүүгдэгчийг яллах, цагаатгах, ял хүндрүүлэх, хөнгөрүүлэх нөхцөл байдлыг эргэлзээгүй тогтоохыг мөрдөгч, прокурорт үүрэгжүүлж, шүүх хэргийн бодит байдлыг талуудын мэтгэлцээний үндсэн дээр тогтооно гэж Эрүүгийн хэрэг хянан шийдвэрлэх тухай хуульд заасан.

          Тус шүүх Нийслэлийн прокурорын газраас яллах дүгнэлт үйлдэж шүүхэд ирүүлсэн яллагдагч Б, М, Г нарт холбогдох хэргийг хянавал “... яллагдагч М, Г нарыг бусдад “мөс” гэх мансууруулах эм, сэтгэцэд нөлөөт бодисыг худалдаалсан” гэж яллаж байгаа боловч тэдгээрийг “мөс” гэх уг бодисыг өөрсдөө хаанаас олж авсныг нь бүрэн гүйцэт шалгаж тогтоогоогүйгээс гадна гэрчүүд тогтворгүй, эрс зөрүүтэй мэдүүлсэн байгаа нь хэргийн бодит байдлыг мөрдөгч, прокурор бүрэн гүйцэт тогтоож чадаагүй гэж үзэхээр байна.

          Дээрх ажиллагааг шүүх хуралдаанаар нөхөн гүйцэтгэх боломжгүй тул яллагдагч Б, М, Г нарт холбогдох хэргийг прокурорт буцааж шийдвэрлэлээ.

          Хэргийг прокурорт буцааж байгаатай холбоотойгоор яллагдагч Б-д урьд авагдсан таслан сэргийлэх арга хэмжээг өөрчилж, түүнд “цагдан хорих” таслан сэргийлэх арга хэмжээ авав.

           Учир нь; яллагдагч Б урьд өмнө “мансууруулах болон сэтгэцэд нөлөөлөх бодистой” холбоотой гэмт хэрэгт шүүхээс 5 жилийн хугацаагаар хорих ял авч, уг ялаа эдэлж байгаад 2 жил 4 сар 19 хоногийн хорих ялаас хугацааны өмнө суллагдсан байхдаа дахин энэ төрлийн гэмт хэрэгт холбогдсон байна.

            Нөгөөтэйгүүр яллагдагч Б нь 2023 оны 5 дугаар сарын 18-ны өдөр товлогдсон шүүхийн урьдчилсан хэлэлцүүлгийн хуралдаанд хүндэтгэн үзэх шалтгаангүйгээр ирээгүй нь түүнд авагдсан таслан сэргийлэх арга хэмжээг өөрчлөх үндэслэл болно.

Хураангуйг бэлтгэсэн: Баянгол дүүргийн Эрүүгийн хэргийн анхан шатны шүүхийн Ерөнхий шүүгч О.Жанчивнямбуу

Хэргийн бодит байдлыг тогтоох нь мөрдөгч, прокурорын үүрэг  
Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүх Facebook  

Сэтгэгдэл бичих:

Нэмэх