ХӨРӨНГИЙН ҮНЭЛГЭЭ ТОГТООСОН ДҮГНЭЛТЭД ОРОЛЦОГЧ ХҮСЭЛТ ГАРГАСАН ТОХИОЛДОЛД ХҮСЭЛТИЙГ ШИЙДВЭРЛЭЖ ТАНИЛЦУУЛНА.

             Шийдвэрийн дугаар: Баянгол дүүргийн Эрүүгийн хэргийн анхан шатны шүүхийн шүүгчийн

                                                    2023 оны 01 дүгээр сарын 25-ны өдрийн 2023/ШЗ/197 дугаар захирамж

             Шийдвэрийн төлөв: Хүчин төгөлдөр болоогүй.

             Процессын хураангуй дугаар №2023/03

Санамж: Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

             2021 оны 7 дугаар сарын 24-ний өдрөөс 25-ны өдөр шилжих шөнө Хан-Уул дүүргийн нутаг дэвсгэрт байрлуулсан иргэн З-гийн эзэмшлийн Kia Rio маркийн автомашины салхины шилийг хагалан нэвтрэн орж дотор нь байсан түлхүүрийг ашиглан автомашиныг хулгайлсан гэх гэмт хэрэгт яллагдагч Э,Б,Д,Г,Б нарыг холбогдуулан яллах дүгнэлт үйлдэж шүүхэд ирүүлсэн бөгөөд яллагдагч нар нь автомашиныг жолоодон явахдаа зам тээврийн осол гаргасны улмаас хохирогч З-ийн автомашинд эвдрэл гэмтэл үүсгэжээ.

          Хэргийг мөрдөн шалгах явцад хохирогч З-гийн автомашинд учирсан эвдрэл гэмтлийн үнийг “Хөрөнгийн үнэлгээ”-гээр тогтоосон бөгөөд хохирогч З нь уг үнэлгээг тогтоосон үнийн дүнг бодитой тогтоогоогүй гэж үзэн дахин шинжилгээ хийлгэх талаар хүсэлт гаргажээ.

            Гэтэл мөрдөгч, прокурор нь хохирогч З-гийн хүсэлтийг шийдвэрлэлгүй яллагдагч Э,Б,Д,Г нарт холбогдуулан яллах дүгнэлт үйлдэж хэргийг шүүхэд шилжүүлжээ.

             Шүүх урьдчилсан хэлэлцүүлгийн шүүх хуралдаанаар хэргийг хянан хэлэлцээд хохирогч З-гийн хүсэлтийг шийдвэрлээгүй нь Эрүүгийн хэрэг хянан шийдвэрлэх тухай хуулийн 33.1 дүгээр зүйлийн 6 дахь хэсгийн 6.14 дэх заалтад заасан “Хэрэг бүртгэлт, мөрдөн байцаалтын явцад оролцогчийн эрхийг зөрчсөн, хууль бусаар хязгаарласан ...” гэж үзэн хэргийг прокурорт буцааж шийдвэрлэв.

Хураангуйг бэлтгэсэн: Баянгол дүүргийн Эрүүгийн хэргийн анхан шатны шүүхийн шүүгч А.Алтанхуяг