Шүүхийн эрхэм зорилго болох Монгол Улсын тусгаар тогтнол, бүрэн эрхт байдал, Үндсэн хуульт байгууллыг бататган бэхжүүлж, хамгаалах, хүний эрх, эрх чөлөөг хамгаалах, зөрчигдсөн эрхийг сэргээн эдлүүлэх, хууль дээдлэх, шударга ёсыг бэхжүүлэх, шударга шүүхээр шүүлгэх иргэний эрхийг ханган шүүн таслах ажиллагааг хэрэгжүүлж байгаа тус шүүхийн нийт шүүгч, шүүхийн захиргааны ажилтнуудыг төлөөлж Та бүхэнд мэндчилгээ дэвшүүлье.

                  Нийгмийн тогтолцоо өөрчлөгдөж, 1992 онд Монгол Улсын шинэ Үндсэн хууль батлагдах хүртэл шүүхийн бүтэц, зохион байгуулалт нь шүүгч, ардын төлөөлөгч нар сонгогддог буюу шүүгчийг сонгуулиар сонгодог байсан бол 1993 оны “Монгол Улсын Шүүхийн тухай хууль”-иар хараат бус, бие даасан шүүх шинэчлэн байгуулагдаж, бүх шатны шүүгчдийг Монгол Улсын Ерөнхийлөгчийн зарлигаар томилдог болсон төдийгүй, шүүхийн бие даасан, шүүгчийн хараат бус байдал “шүүх эрх мэдлийг хэрэгжүүлэх зарчим”-ын эхлэл гэж үзэх үндэслэлтэй.

                  Октябрийн районы Ардын шүүхээс эхлэлтэй Баянгол дүүргийн Эрүүгийн хэргийн анхан шатны шүүхийн түүхэн замнал нь БНМАУ-ын Ардын Их Хурлын Тэргүүлэгчдийн 1965 оны 4 дүгээр сарын 14-ний өдрийн 79 дүгээр зарлигаар Улаанбаатар хотыг 4 районд бүсчлэн хувааж, засаг захиргааны зохион байгуулалт хийгдсэнээр Октябрийн районы Ардын депутатуудын хурлын 1965 оны 6 дугаар сарын 29-ний өдрийн Анхдугаар чуулганаар “Октябрийн районы Ардын шүүх” нэртэй үүсгэн байгуулагдсан байдаг.

                  Энэ цаг хугацаанаас хойш даруй 58 жилтэйгээ золгож буй тухайн шүүх нь бүтэц, зохион байгуулалтын хувьд 1965-1992 онд “Октябрийн районы Ардын шүүх”, 1992-2013 онд “Баянгол дүүргийн шүүх”, 2013-2015 онд “Дүүргийн Эрүүгийн хэргийн анхан шатны 2 дугаар шүүх”, 2015-2016 онд “Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүх”, 2016 оноос өнөөдрийг хүртэл “Баянгол дүүргийн Эрүүгийн хэргийн анхан шатны шүүх” гэсэн нэртэйгээр шүүн таслах ажиллагааг явуулж ирлээ.

                  Октябрийн районы Ардын шүүхийн даргаар Бадарчийн Раапил 1965-1970 онд, Баянжаргалын Жамсрандорж 1970-1971 онд, Дамбын Дашдорж 1971-1973 онд, Чимэдрэгзэнгийн Банзрагч 1973-1974 онд, Чойрын Бямбажав 1974-1977 онд, Өлзийн Шийлэг 1977-1979 онд, Балжирийн Пүрэвдорж 1979-1986 онд, Чимэдийн Доржгочоо 1986-1992 онд,

                  Баянгол дүүргийн шүүхийн Ерөнхий шүүгчээр Намжилдоогийн Чадраабал 1992-1995 онд, Дашдаваагийн Чулуунхүү 1995-2001 онд, Нямдоржийн Ичинхорлоо 2001-2008 онд, Халтарын Батбаяр 2008-2011 онд, Баттогоогийн Цогт 2012-2013 онд, Бямбаагийн Тунгалагсайхан 2013 онд, Дүүргийн Эрүүгийн хэргийн анхан шатны 2 дугаар шүүхийн Ерөнхий шүүгчээр Ёндонгийн Цогтзандан 2013-2015 онд, Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхийн Ерөнхий шүүгчээр Ёндонгийн Цогтзандан 2015-2016 онд тус тус ажиллаж байжээ.

                   2016 онд Монгол Улсын Ерөнхийлөгчийн зарлигаар Осордэлэгийн Жанчивнямбуу Баянгол дүүргийн Эрүүгийн хэргийн анхан шатны шүүхийн Ерөнхий шүүгчээр томилогдсон бөгөөд 2021 оны “Монгол Улсын Шүүхийн тухай хууль”-ийн /шинэчилсэн найруулга/ дагуу тухайн шүүхийн Шүүгчдийн зөвлөгөөний олонхын саналаар Ерөнхий шүүгчээр сонгогдон ажиллаж байна.

                  Тухайн шүүхээс БНМАУ-ын “Гавьяат хуульч” цолоор Октябрийн районы Ардын шүүхийн анхны дарга Бадарчийн Раапил, шүүгч Чимэдийн Доржгочоо нар,

                  Монгол Улсын “Гавьяат хуульч” цол, тэмдгээр Улсын Дээд шүүхийн Эрүүгийн хэргийн танхимын тэргүүн шүүгч Найдангийн Төрбат, Нийслэлийн шүүхийн Ерөнхий шүүгч Базарсүрэнгийн Сарантуяа, Улсын Дээд шүүхийн Ерөнхий шүүгч Содномдаржаагийн Батдэлгэр, Улсын Дээд шүүхийн Ерөнхий шүүгч Цэвэгмидийн Зориг, Улсын Дээд шүүхийн шүүгч Оросоогийн Зандраа, шүүгч Намжилдоогийн Чадраабал, шүүгч Цэдэнноровын Тогоохүү нар шагнагдсан нь бидний хувьд бахархууштай үйл явдал юм.

                  УИХ-ын 2016 оны 42 дугаар тогтоолоор Баянгол дүүргийн Эрүүгийн хэргийн анхан шатны шүүхийг нийт 12 шүүгчтэй байхаар баталсан байдаг бөгөөд өнөөдрийн байдлаар:

                  Ерөнхий шүүгч Ч.Отгонбаяр, шүүгч А.Алтанхуяг, шүүгч Б.Билгүүн, шүүгч Ц.Дайрийжав, шүүгч М.Далайхүү, шүүгч Г.Золбоо, шүүгч Ц.Мөнх-Эрдэнэ, шүүгч Н.Нямдаваа, шүүгч Л.Одончимэг, шүүгч О.Жанчивнямбуу, шүүгч Ц.Эрдэнэчимэг нарын 11 шүүгчтэйгээр хууль дээдлэх, гагцхүү хуульд захирагдахыг шүүхийн зохион байгуулалт, үйл ажиллагааныхаа үндсэн зарчим болгон эрүүгийн хэргийн дагнасан төрлөөр шүүн таслах ажиллагаа явуулж байна.

                               Баянгол дүүргийн Эрүүгийн хэргийн

                               анхан шатны шүүхийн Ерөнхий шүүгч                                     Ч.ОТГОНБАЯР 

                                                                                            2024он