Шийдвэрийн дугаар: 2024 оны 4 дүгээр сарын 25-ны өдрийн 502 дугаар шийтгэх тогтоол

Шийдвэрийн төлөв: Хүчин төгөлдөр болсон.

Тоймын дугаар, огноо: 2024.05.10 №15

Санамж: Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

          Иргэн Б нь 2023 оны 8 дугаар сарын 28-ны өдрөөс 2023 оны 10 дугаар сарын 07-ны өдрийн хооронд Фейсбүүк цахим сүлжээнд “Q” гэх нэршилтэй тоглоомын групп нээн, өөрийн эзэмшлийн банкны дансаар гүйлгээ хийж, мөрийтэй покер тоглоом зохион байгуулан 6.000.000 төгрөгийн ашиг олжээ.

        Сонгинохайрхан дүүргийн Прокурорын газрын хяналтын прокуророос Эрүүгийн хуулийн тусгай ангийн 20.17 дугаар зүйлийн 1 дэх хэсэгт заасан гэмт хэрэгт Б-г холбогдуулан яллах дүгнэлт үйлдэж хэргийг шүүхэд шилжүүлсэн. 

        Эрүүгийн хуулийн тусгай ангийн 20.17 дугаар зүйлийн 1 дэх хэсэгт “Олон нийтийн газар эсхүл мэдээллийн технологи ашиглан ашиг олох зорилгоор шоо, хөзөр, бусад эд зүйл ашиглан үр дүнг нь урьдчилан төсөөлөх боломжгүй, аз туршиж тоглодог мөрийтэй тоглоом зохион байгуулсан бол дөрвөн зуун тавин нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ” гэж хуульчилсан байна.

       Шүүхийн хэлэлцүүлэгт шинжлэн судалсан нотлох баримтуудаар шүүгдэгч Б-ийн үйлдэл нь цахим хэрэгсэл ашиглан үр дүнг нь урьдчилан төсөөлөх боломжгүй, аз туршиж тоглодог “Покер” мөрийтэй тоглоомыг зохион байгуулж, 6.000.000 төгрөгийн ашиг олсон нь тогтоогдсон тул шүүхээс Б-г гэм буруутайд тооцож, найман зуун нэгжтэй тэнцэх хэмжээний төгрөгийн торгох ял оногдуулж, гэмт хэрэг үйлдэж олсон орлого 6.000.000 төгрөгийг улсын орлогод оруулж шийдвэрлэв.

Тойм бэлтгэсэн: Сонгинохайрхан дүүргийн Эрүүгийн хэргийн анхан шатны шүүхийн шүүгч Б.Бямбаабаатар