Шийдвэрийн дугаар: Сонгинохайрхан дүүргийн Эрүүгийн хэргийн анхан шатны шүүхийн шүүгчийн 2024 оны 4 дүгээр сарын 11-ний өдрийн 933 дугаар захирамж

Шийдвэрийн төлөв: Хүчин төгөлдөр болоогүй.

          Иргэн Б нь 2023 оны 12-р сарын 07-ны өдөр Сонгинохайрхан дүүргийн ... дугаар хороо, .... дугаар байрны ... тоотод хэрүүл маргаан үүсгэн Ж-ын биед халдаж хөнгөн гэмтэл, М нь мөн тоотод үл ялих зүйлээр шалтаглан Б-г зодож эрүүл мэндэд нь хөнгөн гэмтэл учруулсан үйлдэлд Сонгинохайрхан дүүргийн Прокурорын газрын хяналтын прокуророос Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан “Хүний эрүүл мэндэд хөнгөн хохирол санаатай учруулах” гэмт хэрэг үйлдсэн гэм буруутайд тооцуулахаар яллах дүгнэлт үйлдэж хэргийг шүүхэд шилжүүлсэн. 

        Прокуророос шүүхэд шилжүүлсэн эрүүгийн хэргийг тус шүүхийн шүүгчдийн зөвлөгөөнөөс баталсан “Хэрэг, өргөдөл, гомдол, хүсэлт хүлээн авах, хуваарилах, хэрэг хянан шийдвэрлэх шүүгч, шүүх бүрэлдэхүүнийг сугалаагаар томилох нарийвчилсан журам”-д заасны дагуу шүүгчид хуваарилж, 15 хоногийн дотор яллагдагчийг шүүхэд шилжүүлэх, хэргийн прокурорт буцаах эсхүл түдгэлзүүлэх, хэргийг харьяалах шүүхэд шилжүүлэх шийдвэрийн аль нэгийг гаргадаг.

      Хэргийн оролцогч нараас яллах дүгнэлтэд заасан гэмт хэргийн хүрээнд шүүхийн урьдчилсан хэлэлцүүлэг явуулах хүсэлт, гомдол гаргах эсхүл шүүх өөрийн санаачилгаар дараах асуудлыг хянан хэлэлцэж шийдвэрлэдэг. Үүнд:

1.Өмгөөлүүлэх эрхээ хэрэгжүүлэхтэй холбоотой хүсэлт;

2.Хохирогчийн хууль ёсны төлөөлөгчийг томилох, өөрчлөх талаарх санал, хүсэлт;

3.Эрүүгийн хэргийг түдгэлзүүлэх, эсхүл энэ хуулийн 1.5 дугаар зүйлийн 1.2, 1.3, 1.4, 1.5-д заасан нөхцөл байдал бий болсонтой холбоотой хүсэлт;

4.Прокурорын яллах дүгнэлтэд гарсан үг, үсэг, тоо, тооцооны зэрэг техникийн шинжтэй алдааг засуулах хүсэлт;

5.Яллагдагч гэмт хэргийн улмаас учирсан хохирол, нөхөн төлбөрийг төлөх тухай хүсэлт;

6.Шүүх хуралдааныг хялбаршуулж явуулах тухай хүсэлт;

7.Яллагдагч, хохирогч нар сайн дураараа эвлэрэх тухай хүсэлт;

8.Яллах дүгнэлт албан ёсоор гардуулаагүй тухай гомдол;

9.Шүүх хуралдааны товын талаарх санал, хүсэлт;

10.Шүүх хуралдаанд дуудах хохирогч, гэрч, шинжээч, шинжлэн судлуулах нотлох баримтын талаарх прокурор, оролцогчийн санал, хүсэлт;

11.Шүүх хуралдааныг хаалттай явуулах хүсэлт;

12.Таслан сэргийлэх арга хэмжээтэй холбоотой санал, хүсэлт;

13.Нотлох баримт цуглуулж, бэхжүүлэх талаар энэ хуульд заасан журам зөрчигдсөн талаар гаргасан гомдол;

14.Хэрэг бүртгэлт, мөрдөн байцаалтын явцад оролцогчийн эрхийг зөрчсөн, хууль бусаар хязгаарласан тухай гомдол;

15.Мөрдөн шалгах ажиллагаа нэмж хийлгэх хүсэлт;

16.Хөрөнгө хураан авах ажиллагаатай холбоотой санал, хүсэлт;

17.Эрүүгийн хэрэг үүсгэж яллагдагчаар татсан тогтоол албан ёсоор танилцуулаагүй болон уг тогтоол ойлгомжгүй тухай гомдол багтдаг.

    Яллагдагч Б, М нарын өмгөөлөгчдийн гаргасан хүсэлтийг үндэслэн Шүүхийн урьдчилсан хэлэлцүүлгийн товыг тогтоож, шүүхээс хэргийг эцэслэн шийдвэрлэх боломжгүй, нотолбол зохих байдлуудыг бүрэн гүйцэт шалгаж, тодруулаагүй, мөрдөн байцаалтын явцад оролцогчийн эрхийг зөрчилтэй, нотлох баримтын хүрэлцэхүйц байдал бүрдээгүй, урьдчилсан нөхцөл хангагдаагүй тул тэдэнд холбогдох хэрэгт мөрдөн шалгах ажиллагаа нэмж хийлгүүлэхээр прокурорт буцааж шийдвэрлэв.

Тойм бэлтгэсэн: Сонгинохайрхан дүүргийн Эрүүгийн хэргийн анхан шатны шүүхийн шүүгч Б.Бямбаабаатар