Шүүхийн нэр, шийдвэрийн дугаар:  Сонгинохайрхан дүүргийн Эрүүгийн хэргийн анхан шатны шүүх 2023/ШЗ/2786

Шийдвэрийн төлөв: Хүчин төгөлдөр болсон.

Санамж: Энэ хураангуй нь шүүхийн шийдвэр биш бөгөөд түүнийг орлохгүй, зөвхөн олон нийтэд ойлгомжтой байдлаар мэдээлэл хүргэх зорилготой болохыг тэмдэглэв.

         Прокуророос Б.Б-г хүний эрүүл мэндэд хүндэвтэр хохирол санаатай учруулсан гэмт хэрэг үйлдсэнээ хүлээн зөвшөөрсөн, учруулсан хохирлоо төлсөн гэдэг үндэслэлээр “Эрх бүхий байгууллагын хяналтад Сүхбаатар дүүргийн нутаг дэвсгэрээс явахыг хориглох, эрх бүхий байгууллагын зөвшөөрөлтэйгөөр оршин суух газраа өөрчлөх үүргийг 03 сарын хугацаагаар хүлээлгэх” зорчих эрхийг хязгаарлах ял оногдуулах санал гаргасныг яллагдагч Б.Б хүлээн зөвшөөрсөн тул тус хэргийг хялбаршуулсан журмаар шийдвэрлүүлэхээр шүүхэд ирүүлсэн. 

       Хялбаршуулсан журмаар хэрэг хянан шийдвэрлэх ажиллагаа нь эрүүгийн хэрэг хянан шийдвэрлэх тусгай журам баримтлан явуулдаг бөгөөд энэ хэргийн хувьд, прокуророос Эрүүгийн хэрэг хянан шийдвэрлэх тухай хуулийн 17.3 дугаар зүйлийн 3 дахь хэсэгт зааснаар 3 сарын хугацаагаар зорчих эрхийг хязгаарлах ял оногдуулах саналыг шүүхэд гаргасныг буруутгахгүй.

         Б.Б өмнө дээрэмдэх гэмт хэрэгт шүүхээс 01 жил 06 сарын хугацаагаар  хорих ял шийтгүүлж, уг ялаа эдэлж байхад өмнө үйлдсэн хэрэг нь илэрсэн. Прокуророос одоо эдэлж буй хорих ял, шүүх рүү шилжүүлсэн хэрэгт оногдуулах Зорчих эрх хязгаарлах ялуудыг Эрүүгийн хуулийн ерөнхий ангийн 6.8 дугаар  зүйлийн 2 дахь хэсэгт  зааснаар тус тусад нь эдлүүлэх тухай саналыг гаргаж яллагдагчаар гарын үсэг зуруулсан нь Эрүүгийн хуулийг буруу хэрэглэсэн, шүүхийн эрх хэмжээнд халдсан гэж үзсэн.

         Дээрх тохиолдолд Эрүүгийн хуулийн ерөнхий ангийн 6.8 дугаар зүйлийг биш 6.9 дүгээр зүйлийг хэрэглэх үндэслэлд хамаарч байгаа.

         Эрүүгийн хуулийн ерөнхий ангийн 6.8, 6.9 дүгээр зүйлд заасан зохицуулалт нь зөвхөн шүүх хэрэгжүүлэх эрх зүйн хэм хэмжээ бөгөөд тухайн хэргийн  холбогдогчийн эрх зүйн  байдлыг харгалзан үзэж ялыг нэмж нэгтгэх эсхүл тус тусад нь эдлүүлэхээр шийдвэрлэх эсэх нь шүүхэд хуулиар олгосон онцгой эрх хэмжээ тул Б.Б-д холбогдох хэргийг прокурорт буцааж шийдвэрлэсэн болно.

Хураангуй бэлтгэсэн: Сонгинохайрхан дүүргийн Эрүүгийн хэргийн анхан шатны шүүхийн шүүгч Г.Алтанцэцэг