Шүүгдэгч түүний өмгөөлөгч нараас гаргасан хүсэлт, мөн ирээгүй нь шүүх хуралдааныг

хойшлуулах үндэслэл болно

Шүүхийн нэр: Сонгинохайрхан дүүргийн Эрүүгийн хэргийн анхан шатны шүүх

Шийдвэрийн дугаар: 2023 оны 6 дугаар сарын 23-ны өдрийн дугаар 1426 захирамж

Процессын тойм: № 02

Огноо: 2023.06.28-ны өдөр

Шийдвэрийн төлөв: Хүчин төгөлдөр болсон

Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно”

          Прокуророос Ө-г хүний эрүүл мэндэд хөнгөн хохирол санаатай учруулсан, хохирогч нь бусдыг гэмт хэрэг үйлдсэн гэж мөрдөн шалгах ажиллагааны үед худал мэдүүлсэн, гүтгэсэн, гэрчийг зориуд худал мэдүүлэг өгүүлэх зорилгоор өөрт нь хүч хэрэглэхээр заналхийлсэн, шан харамж амласан гэмт хэрэгт, М-г хүний эрүүл мэндэд хөнгөн хохирол санаатай учруулсан гэмт хэрэгт, Т, Г нарыг гэрч бусдыг гэмт хэрэг үйлдсэн гэж мөрдөн шалгах ажиллагааны үед худал мэдүүлсэн, гүтгэсэн гэмт хэрэгт, Д-г гэрч бусдыг гэмт хэрэг үйлдсэн гэж мөрдөн шалгах ажиллагааны үед худал мэдүүлсэн, гүтгэсэн гэмт хэрэгт тус тус холбогдуулан яллах дүгнэлт үйлдэж 2023 оны 4 дүгээр сарын 10-ны өдөр шүүхэд ирүүлжээ.

             2023 оны 4 дүгээр сарын 14-ний өдөр яллагдагч Ө-ын хүсэлтээр шүүхийн урьдчилсан хэлэлцүүлэг явуулах товыг тогтож, 2023 оны 4 дүгээр сарын 19-ний өдөр хянан хэлэлцэж, шүүхийн урьдчилсан хэлэлцүүлгийн хуралдаанаас яллагдагч нарыг шүүхэд шилжүүлсэн.

          Шүүх хуралдааны товыг 2023 оны 5 дугаар сарын 03-ны өдөр зарласан боловч шүүгдэгч Д, М нарын өмгөөлөгч нарын “шүүх хуралдаан давхацсан тул хойшлуулж өгнө үү” гэх хүсэлт, шүүгдэгч Ө “хэргийн материалтай бүрэн танилцах, гэрч нарыг оролцуулах” хүсэлтээр 1 удаа,

           2023 оны 5 дугаар сарын 16-ны өдөр шүүгдэгч Д эрүүл мэндийн шалтгаан (цус харвалт)-аар шүүх хуралдаанд ирээгүй, шүүгдэгч Ө “шүүх хуралд гэрч оролцуулах, түүний өмгөөлөгч хүндэтгэн үзэх шалтгаангүйгээр хүрэлцэн ирээгүй” гэх үндэслэлээр 2 дахь удаа,

          2023 оны 6 дугаар сарын 05-ны өдөр “хяналтын прокурор чөлөөтэй тул хойшлуулж өгнө үү” гэх прокурорын хүсэлт, шүүгдэгч Д эрүүл мэндийн шалтгаанаар шүүх хуралдаанд ирээгүй, шүүгдэгч Ө-н өмгөөлөгч хүндэтгэн үзэх шалтгаангүйгээр ирээгүй, гэрчийг албадах ирүүлэх шаардлагатай үндэслэлээр 3 дахь удаа,

           2023 оны 6 дугаар сарын 23-ны өдөр шүүгдэгч Д эрүүл мэндийн шалтгаанаар шүүх хуралдаанд ирээгүй, шүүгдэгч Ө-н өмгөөлөгч хүндэтгэн үзэх шалтгаангүйгээр ирээгүй, шүүгдэгч Г “Төв аймагт шүүх хуралд хохирогчоор оролцох тул хойшлуулж өгнө үү” гэх үндэслэлүүдээр 4 дэх удаа шүүх хуралдаан хойшлогдсон.

         Эрүүгийн хэрэг хянан шийдвэрлэх тухай хуульд зааснаар шүүх хэргийн бодит байдлыг талуудын мэтгэлцээний үндсэн дээр тогтоох ба шүүгдэгч Ө-ийн өмгөөлөгч шүүх хуралдааны товыг мэдсэн атлаа 3 удаа шүүх хуралдаанд хүндэтгэн үзэх шалтгаангүйгээр ирээгүй тул Монголын өмгөөлөгчдийн холбоонд албан бичиг явуулсан.  

       Мөн шүүгдэгч нар хэргийн талаар харилцан эсрэг сонирхолтой бөгөөд шүүгдэгчийн нэг нь өмгөөлөгчтэй байгаа бол бусад шүүгдэгч нар заавал өмгөөлөгчтэй оролцохыг хуулиар зохицуулсан тул шүүгдэгч Ө-д хуульд зааснаар томилогдсон өмгөөлөгч оролцуулахаар Монголын өмгөөлөгчдийн холбоонд албан бичиг явуулаад байна.   

Уг хэргийн шүүх хуралдааныг 2023 оны 7 дугаар сарын 06-ны өдөр товлосон болно.

            Тоймыг бэлтгэсэн: Сонгинохайрхан дүүргийн Эрүүгийн хэргийн анхан шатны шүүхийн шүүгч Л.Баатар