Шүүгчийн захирамжийн дугаар: Баянгол дүүргийн Эрүүгийн хэргийн анхан шатны шүүхийн 2023 оны 11 дүгээр сарын 28-ны өдрийн 2023/ШЗ/1885 дугаар шүүгчийн захирамж

Шийдвэрийн төлөв: Хуулийн хүчин төгөлдөр болоогүй.

Процессын шийдвэрийн тойм дугаар: 2024/01

Шүүгдэгч Э нь согтуурсан үедээ 2023 оны 9 дүгээр сарын 04-ний өдөр Баянгол дүүргийн 22 дугаар хорооны нутаг дэвсгэрт М-тэй хэрүүл маргаан үүсгэж, үүссэн маргааны явцад М-ын цээж, хавирга хэсэг рүү нь хөлөөрөө өшиглөх, гараараа цохих зэргээр биед нь халдаж эрүүл мэндэд нь хүнд хохирол санаатай учруулсан гэмт хэрэгт холбогдуулан яллах дүгнэлт үйлдэж хэргийг шүүхэд шилжүүлжээ.

Шүүх урьдчилсан хэлэлцүүлгийн шүүх хуралдаанаар хэргийг хянан хэлэлцээд мөрдөн шалгах ажиллагааны явцад бичиг мэдэхгүй яллагдагч Э-г оролцуулахдаа яллагдагчид эрх, үүрэг, шинжээчийн дүгнэлт танилцуулсан болон хэргийн материал танилцуулах зэрэгт өмгөөлөгч оролцуулалгүй эрүүгийн хэрэг хянан шийдвэрлэх ажиллагааг явуулсан нь Эрүүгийн хэрэг хянан шийдвэрлэх тухай хуулийн 5.3 дугаар зүйлийн 1 дэх хэсгийн 1.3 дахь заалтыг ноцтой зөрчигдсөн гэж үзэн хэргийг прокурорт буцааж шийдвэрлэв.

Санамж: Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

Тоймыг бэлтгэсэн: Баянгол дүүргийн Эрүүгийн хэргийн анхан шатны шүүхийн шүүгч А.Алтанхуяг