МОНГОЛ УЛСАД ЗӨВШӨӨРӨГДӨӨГҮЙ ЭМЧИЛГЭЭ ХИЙСЭН ХЭРГИЙГ ШИЙДВЭРЛЭВ

2023/12/11 330
МОНГОЛ УЛСАД ЗӨВШӨӨРӨГДӨӨГҮЙ ЭМЧИЛГЭЭ ХИЙСЭН ХЭРГИЙГ ШИЙДВЭРЛЭВ

Шийдвэрийн дугаар: Баянгол дүүргийн Эрүүгийн хэргийн анхан шатны шүүхийн 2022 оны 12 дугаар сарын 05-ны өдрийн 928 дугаартай шийтгэх тогтоол

Шийдвэрийн төлөв: Хүчин төгөлдөр болоогүй.

Шүүхийн шийдвэрийн тойм дугаар: 2023 оны 12 дугаар сарын 05 №10

Санамж: Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

          Иргэн И нь 2022 оны 8 дугаар сарын 18-ны өдөр Баянгол дүүргийн дугаар хорооны нутаг дэвсгэрт байрлах Л хувийн эмнэлэгт эмчээр ажиллаж байхдаа Озон буюу хүчилтөрөгчийн эмчилгээг жирэмсэн эх М-д үзүүлсний  улмаас М  таталт өгч улмаар Эх хүүхдийн эрүүл мэндийн үндэсний төвд хүргэгдэн бөглөрлийн шок, судсанд цус түгээмэл бүлэгнэх хам шинжээр хүндрэн зүрхний дутагдал давамгайлсан олон эрхтний дутагдлаар нас баржээ.

Баянгол прокурорын газрын хяналтын прокуророос И-г  “болгоомжгүйгээр хүний амь насыг хохироосон” гэмт хэрэгт хэрэгт холбогдуулж яллах дүгнэлт үйлдэж хэргийг шүүхэд ирүүлсэн байна.

           Шүүхээс, И-г болгоомжгүйгээр хүний амь насыг хохироох гэмт хэрэг үйлдсэн гэм буруутайд тооцож, түүнд 1 /нэг/ жил 1 /нэг/ сарын хугацаагаар хорих ял, 5 /тав/ жилийн хугацаагаар эмчлэх мэргэжлийн үйл ажиллагаа явуулах эрх хасах ялыг нэмж оногдуулж шийдвэрлэв.

            Монгол Улсад эмнэлгийн тусламж, үйлчилгээ нь батлагдсан хэм хэмжээний хүрээнд зөвшөөрөгдсөн байхыг шаардах ба амь хохирогч М-д шүүгдэгч И-ийн үзүүлсэн Озон буюу хүчилтөрөгчийн эмчилгээг Монгол Улсын стандарт хэмжил зүйн газраар батлагдаагүй, тодруулбал эмнэлгийн тусламж үйлчилгээ үзүүлэх тусгай зөвшөөрөлтэй байгууллага болон эмчлэх эрхийн зөвшөөрөлтэй эмч нарт зөвшөөрөгдөөгүй бөгөөд зөвхөн яаралтай тусламжийн болон эрчимт эмчилгээний чиглэлийн тусламж үзүүлэх эмнэлэг сэхээн амьдруулах эрчимт эмчилгээний салбарт зөвхөн цус цэвэршүүлэх зорилгоор хийхээр холбогдох стандартад  заасан байна.

             Шүүгдэгч И-нь эмч мэргэжлийнхээ хүрээнд ОХУ-д “Озоны эмчилгээний тулгамдсан асуудлууд” сэдэвт 72 цагийн сургалтад хамрагдсан байх ба зөвхөн яаралтай тусламжийн болон эрчимт эмчилгээний чиглэлийн тусламж үзүүлэх эмнэлэг сэхээн амьдруулах эрчимт эмчилгээнд  хийгдэх  Озон эмчилгээг амь хохирогчид үзүүлж улмаар хүний амь нас хохирсон нь Эрүүгийн хуульд заасан  болгоомжгүй гэмт хэргийн шинжтэй гэж шүүхээс дүгнэв.

Хураангуйг бэлтгэсэн: Баянгол дүүргийн Эрүүгийн хэргийн анхан шатны шүүхийн шүүгч Ц.Эрдэнэчимэг

 

 

 

МОНГОЛ УЛСАД ЗӨВШӨӨРӨГДӨӨГҮЙ ЭМЧИЛГЭЭ ХИЙСЭН ХЭРГИЙГ ШИЙДВЭРЛЭВ  
Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүх Facebook  

Сэтгэгдэл бичих:

Нэмэх