Шүүгчийн захирамж: Баянгол дүүргийн Эрүүгийн хэргийн анхан шатны шүүхийн 2023 оны 10 дугаар сарын 17-ны өдрийн 1673 дугаар.

Шийдвэрийн төлөв: Хүчин төгөлдөр.

Процессын хураангуй дугаар: 2023 оны 10 дугаар сарын 24 № 9

       Прокуророос шүүгдэгч Д-д холбогдуулан Эрүүгийн хуулийн тусгай ангийн 20.7 дугаар зүйлийн 1 дэх хэсэгт заасан буюу хориглосон мансууруулах эм, сэтгэцэд нөлөөт бодисыг худалдаалах зорилгогүйгээр олж авсан, хадгалсан гэмт хэрэгт холбогдуулан яллах дүгнэлт үйлдэж, хэргийг шүүхэд шилжүүлсэн байна.

        Шүүх хэргийг хүлээн аваад яллагдагчийг шүүхэд шилжүүлж, шүүх хуралдааныг 2023 оны 10 дугаар сарын 17-ны өдөр товлосон.

      Шүүх хуралдаанд шүүгдэгч Д-н өмгөөлөгч “миний үйлчлүүлэгч С5, С6 нугалмын хоорондын жийргэвч мөгөөрсний ивэрхийн улмаас дарагдсан, хүчтэй өвдөлтийн улмаас эмнэлэгт хэвтэн эмчүүлж байна. Холбогдох баримтыг гарган өгч байна. Иймд шүүх хуралдааныг хойшлуулж өгнө үү гэжээ.

     Эрүүгийн хэрэг хянан шийдвэрлэх тухай хуулийн 34.9 дүгээр зүйлийн 1 дэх хэсэгт “Анхан шатны журмаар хэргийг хянан шийдвэрлэх шүүх хуралдаанд шүүгдэгчийг оролцуулна. Шүүгдэгч ирээгүй нь шүүх хуралдааныг хойшлуулах үндэслэл болно” гэж хуульчилжээ.

       Шүүгдэгч Б нь хүндэтгэн үзэх шалтгаанаар буюу эрүүл мэндийн байдлаас шалтгаалан эмнэлэгт хэвтсэн, холбогдох баримтуудыг шүүгдэгчийн өмгөөлөгч шүүх хуралдаанд гаргаж өгсөн.

       Эрүүгийн хэрэг хянан шийдвэрлэх тухай хуульд заасны дагуу шүүгдэгч нь шүүх хуралдаанд өөрийн биеэр оролцох ёстой тул шүүгдэгч ирээгүй нь шүүх хуралдааныг хойшлуулах үндэслэл болж шүүгдэгч Б-д холбогдох шүүх хуралдааныг хойшлуулав.

       Шүүгдэгч нь эмнэлэгт хэвтсэн буюу хүндэтгэн үзэх шалтгаантайгаар шүүх хуралдаанд ирээгүй тул түүнд урьд авсан хувийн баталгаа гаргах таслан сэргийлэх арга хэмжээг хэвээр үргэлжлүүлэв.

Хураангуйг бэлтгэсэн: Баянгол дүүргийн Эрүүгийн хэргийн анхан шатны шүүхийн шүүгч Ч.Отгонбаяр