Шийдвэрийн дугаар: Баянгол дүүргийн Эрүүгийн хэргийн анхан шатны шүүхийн 2022 оны 04 дүгээр сарын 04-ний өдрийн 512 дугаартай шүүгчийн захирамж.

Шийдвэрийн төлөв: Хүчин төгөлдөр болсон.

Процессын хураангуй дугаар №2023/6

Санамж: Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

         Нийслэлийн Баянгол дүүргийн прокурорын газраас шүүгдэгч Э-г Эрүүгийн хуулийн тусгай ангийн 17.1 дүгээр зүйлийн 1 дэх хэсэгт заасан гэмт хэрэгт холбогдуулан яллах дүгнэлт үйлдэж хэргийг хялбаршуулсан журмаар хянан шийдвэрлүүлэх саналтай шүүхэд хэргийг ирүүлэхдээ “шүүгдэгчид торгох ял оногдуулах” тухай санал гаргасан нь хууль зөрчсөн гэж үзлээ.

          Учир нь Эрүүгийн хуулийн тусгай ангийн 17.1 дүгээр зүйл буюу “Хулгайлах” гэмт хэрэгт “Нийтэд тустай ажил хийлгэх ял”, “Зорчих эрхийг хязгаарлах ял”, “Хорих ял”-аас аль нэгийг шүүх гэмт хэрэг үйлдсэн нөхцөл байдал, учирсан хохирол, хор уршгийн шинж чанар, гэмт хэрэг үйлдсэн хүний хувийн байдал зэргийг харгалзан оногдуулахаар хуульчилсан байна. 

          Өөрөөр хэлбэл прокурор шүүгдэгчтэй эрүүгийн хариуцлагын талаар тохиролцохдоо тухайн хэргийн зүйл, заалтын ялын санкцид хуульчлагдаагүй “Торгох ял оногдуулах тухай” санал гаргасан байгаа нь Эрүүгийн хуулийг буруу хэрэглэсэн ноцтой зөрчил гэж үзэж прокурорын хууль буруу хэрэглэсэн саналын хүрээнд тухайн хэргийг шийдвэрлэх боломжгүй тул хэргийг прокурорт буцааж шийдвэрлэлээ.  

 Хураангуйг бэлтгэсэн: Баянгол дүүргийн Эрүүгийн хэргийн анхан шатны шүүхийн шүүгч М.Далайхүү