Европын холбооны гишүүн улсуудын хүндэт шүүгч, хуульчид, эрхзүйн хөгжлийн чиглэлээр үйл ажиллагаа явуулдаг байгууллагуудын төлөөллийн бүрэлдэхүүн бүхий баг өнөөдөр Баянгол, Хан-Уул, Сонгинохайрхан дүүргийн эрүүгийн хэргийн анхан шатны шүүхэд зочилж, албан уулзалт эхэллээ.

Уулзалтад Шүүхийн ерөнхий зөвлөлийн гишүүн Н.Баасанжав, Нийслэлийн эрүүгийн хэргийн Давж заалдах шатны шүүхийн шүүгч Г.Даваадорж нар оролцлоо.

Хан-Уул дүүргийн эрүүгийн хэргийн анхан шатны шүүхийн Ерөнхий шүүгч Б.Батболор шүүхийн үйл ажиллагааны талаар тойм мэдээлж, шүүгч Ц.Мөнх-Эрдэнэ эрүүгийн хэргийг хүлээн авах ажиллагаа, шүүх хуралдааныг цахимаар зохион байгуулах үйл явцын талаар танилцуулга мэдээлэл өгч харилцан яриа өрнүүллээ.

Тэд шүүхүүдийг цахимжуулахад бодлого, үйл ажиллагааг уялдуулах, шилдэг дадал, туршлагыг ижил түвшний байгууллагад хуваалцахад дэмжлэг үзүүлэх зорилготойгоор тус шүүхийн үйл ажиллагаатай танилцлаа.