Шүүхийн нэр: Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүх
Шийдвэрийн дугаар: 2025 оны 10 дугаар сарын 07-ны өдрийн 6011, шүүгчийн захирамж
Процессын тойм: № 08
Огноо: 2025.11.28-ны өдөр
Шийдвэрийн төлөв: Хүчин төгөлдөр болсон.
Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно”
Прокуророос шүүгдэгч Р, М, Г нарт холбогдуулан Эрүүгийн хуулийн тусгай ангийн 17.4 дүгээр зүйлийн 1, 18.6 дугаар зүйлийн 1 дэх хэсэгт зааснаар яллах дүгнэлт үйлдэж, хэргийг шүүхэд шилжүүлсэн.
Шүүх хуралдаанд шүүгдэгч Р нь хүрэлцэн ирээгүй ба Шүүхийн шийдвэр гүйцэтгэх Ерөнхий газрын харьяа Цагдан хорих 461 дүгээр хаалттай хорих ангиас шүүгдэгч Р-г Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхийн шийтгэх тогтоолоор хорих ялаар шийтгүүлж, Шүүхийн шийдвэр гүйцэтгэх Ерөнхий газрын харьяа 425 дугаар нээлттэй хорих ангид хорих ялаа эдэлж байгаа талаар шүүхэд мэдэгдсэн.
Шүүх хуралдаанд шүүгдэгч заавал оролцох үндэслэлтэй тул шүүхээс шүүх хуралдааныг хойшлуулж, шүүгдэгч Р-д цагдан хорих таслан сэргийлэх арга хэмжээ авч, Шүүхийн шийдвэр гүйцэтгэх Ерөнхий газрын харьяа 425 дугаар нээлттэй хорих ангиас Шүүхийн шийдвэр гүйцэтгэх Ерөнхий газрын харьяа Цагдан хорих 461 дүгээр хаалттай хорих ангид шилжүүлэх авчрахыг прокурорт даалгаж шийдвэрлэсэн.
Хяналтын прокуророос Улсын Ерөнхий Прокурорын газарт шүүгдэгч Р-г шилжүүлэн цагдан хорих тухай танилцуулгыг хүргүүлсэн ба Улсын Ерөнхий Прокурорын газраас “...Шүүхийн шийдвэр гүйцэтгэх тухай хуулийн 212 дугаар зүйлийн 121.1 дэх хэсэгт “Хоригдол шүүхийн шийтгэх тогтоол гарахаас өмнө, эсхүл ял эдэлж байх хугацаандаа гэмт хэрэг үйлдсэн гэх хангалттай үндэслэл тогтоогдсон бол прокурорын зөвшөөрлийг үндэслэн хэрэг бүртгэх, мөрдөн байцаах байгууллагад шилжүүлж болно” гэж зохицуулсан байна. Хоригдлыг шүүхэд шилжүүлэх талаар эрх зүйн зохицуулалт байхгүй тул зөвшөөрөл олгох боломжгүй” гэсэн албан бичиг шүүхэд ирүүлсэн.
Шүүхээс шүүн таслах ажиллагааг хэвийн, тасралтгүй явуулах үүднээс шүүгдэгч Р-г шүүх хуралдаанд ирүүлэхээр Шүүхийн шийдвэр гүйцэтгэх Ерөнхий газрын харьяа 425 дугаар нээлттэй хорих ангид албан бичиг, шүүгдэгчийг дуудан ирүүлэх тухай мэдэгдлийг хүргүүлэх ажиллагаа хийсэн.
Уг хэрэг хянан шийдвэрлэх ажиллагааны дагуу тус хорих ангиас шүүгдэгч Р-г шүүх хуралдаанд хуяглан ирүүлж, уг өдрөөр түүний эдэлсэн ялын тооцоог гаргуулан ирүүлсэн тул шүүх хуралдааныг эхлүүлэн, хэргийг эцэслэн шийдвэрлэж шүүхээс Шийтгэх тогтоол гарсан.
Шүүгдэгчийн гэм бурууг эцэслэн шийдвэрлэсэн тул шүүгдэгч Р-г Шүүхийн шийдвэр гүйцэтгэх газрын харьяа 461 дүгээр хорих ангид шилжүүлэн шийтгэх тогтоол хүчин төгөлдөр болох хүртэл цагдан хорих таслан сэргийлэх арга хэмжээ авсан болно.
Тоймыг бэлтгэсэн: Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүх шүүгч Ч.Отгонбаяр