Шүүхийн нэр: Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүх
Шийдвэрийн дугаар: 2025 оны 10 дугаар сарын 27-ны өдрийн дугаар 6312, шүүгчийн захирамж
Процессын тойм: № 07
Огноо: 2025.10.27-ны өдөр
Шийдвэрийн төлөв: Хүчин төгөлдөр болсон.
Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно”
Прокуророос Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1, 2.7, 2.8 дахь заалт, мөн ангийн 16.7 дугаар зүйлийн 2 дахь хэсэгт заасан гэмт хэрэгт Э-г,
Эрүүгийн хуулийн тусгай ангийн 16.11 дүгээр зүйлийн 3 дахь хэсэгт заасан гэмт хэрэгт Л-г тус тус холбогдуулан яллах дүгнэлт үйлдэж 2025 оны 09 дүгээр сарын 29-ний өдөр шүүхэд ирүүлжээ.
Яллагдагч Э, Л нарын өмгөөлөгч нараас шүүхийн урьдчилсан хэлэлцүүлэг хийлгэх тухай хүсэлт гаргасны дагуу шүүхийн урьдчилсан хэлэлцүүлгийг 2025 оны 10 дугаар сарын 27-ны өдөр товлож, тус өдрийн хуралдаанд хохирогчийн хууль ёсны төлөөлөгчийн өмгөөлөгч С-ээс “Увс аймгийн Давж заалдах шатны шүүхэд Ч нарт холбогдох хэргийн шүүх хуралтай тул дээрх хүндэтгэн үзэх шалтгааныг харгалзан үзэж шүүх хурлыг хойшлуулж өгнө үү.” гэх,
- Яллагдагч Э нь “Өмгөөлөгч Б-с татгалзаад 3 сар болж байгаа тул өөр өмгөөлөгч авч урьдчилсан хэлэлцүүлгийн хуралдаанд оролцох...” гэх хүсэлтүүдийг тус тус гаргасан.
Прокуророос оролцогч нарын гаргасан дээрх хүсэлтүүдийг хүлээн авч хуралдааныг хойшлуулж өгнө үү гэсэн тайлбар хэлсэн.
Эрүүгийн хэрэг хянан шийдвэрлэх тухай хуулийн 7.6 дугаар зүйлийн 3 дахь хэсэгт “Эрүүгийн хэрэг хянан шийдвэрлэх ажиллагааны явцад шүүх ...яллагдагч өөрийгөө өмгөөлөх, эсхүл өмгөөлүүлэх, хууль зүйн туслалцаа авах эрхээ эдлэх боломжоор хангана” гэж,
мөн хуулийн 5.3 дугаар зүйлийн 1 дэх хэсэгт “дараах сэжигтэн, яллагдагч, шүүгдэгч оролцох эрүүгийн хэрэг хянан шийдвэрлэх ажиллагааг өмгөөлөгчгүйгээр явуулж болохгүй.” 1.4 дэх заалтад “бүх насаар хорих ял оногдуулж болох” гэж,
мөн хуулийн 34.12 дугаар зүйлийн 1 дэх хэсэгт “Өмгөөлөгч ... шүүх хуралдаанд оролцох боломжгүй бол энэ тухай шүүхэд урьдчилан бичгээр мэдэгдэнэ. Өмгөөлөгч ...шүүх хуралдаанд хүрэлцэн ирээгүй тохиолдолд шүүх хуралдааныг хойшлуулна” гэж тус тус хуульчилсан байна.
Иймд дээрх үндэслэлүүдээр яллагдагч Л, Э нарт холбогдох хэргийн шүүхийн урьдчилсан хэлэлцүүлгийг хойшлуулж, товыг 2025 оны 11 дүгээр сарын 03-ны өдрийн 13 цаг 30 минутад товлосон болно.
Тоймыг бэлтгэсэн: Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхийн шүүгч Д.Доржсүрэн