Шүүхийн нэр: Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүх
Шийдвэрийн дугаар: 2025 оны 9 дүгээр сарын 18-ны өдрийн дугаар 5681, шүүгчийн захирамж
Процессын тойм: № 07
Огноо: 2025.09.18-ны өдөр
Шийдвэрийн төлөв: Хүчин төгөлдөр болсон.
Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.”
Прокуророос С-г нэр бүхий 100 хохирогчийг хуурч, цахим хэрэгсэл “фэйсбүүк” ашиглаж “Дэггүй Моньд”, “Sunnywood Furniture” гэх хаягуудаас “Хүүхдийн ор зарна” гэсэн хуурамч заруудыг байршуулан зохиомол байдлыг зориудаар бий болгож, бодит байдлыг нуух замаар бусдыг төөрөгдөлд оруулж эзэмшигч, өмчлөгчийн эд хөрөнгийг үргэлжилсэн үйлдлээр шилжүүлэн авсан залилах гэмт хэргийг бусдад их хэмжээний хохирол учруулж үйлдсэн гэх гэмт хэрэгт холбогдуулан яллах дүгнэлт үйлдэж 2025 оны 7 дугаар сарын 03-ны өдөр шүүхэд ирүүлжээ.
2025 оны 7 дугаар сарын 18-ны өдөр яллагдагч С-ийг шүүхэд шилжүүлж, шүүх хуралдааныг 2025 оны 7 дугаар сарын 25-ны өдөр товлосон.
2025 оны 7 дугаар сарын 25-ны өдрийн хуралдаанд ирүүлсэн шүүгдэгч С-ийн өмгөөлөгчөөс “Эрүүл мэндийн шалтгаанаар Солонгос улс руу явах, хагалгаанд орох шаардлагатай тул шүүх хуралдааныг хойшлуулж өгнө үү” гэх, “хяналтын прокурор чөлөөтэй тул хойшлуулж өгнө үү” гэх хүсэлтүүдээр шүүх хуралдаан хойшлогдсон.
Дээрх хүсэлтүүдийг үндэслэн шүүх хуралдааныг 2025 оны 9 дүгээр сарын 18-ны өдрийн 09 цаг 00 минутад товлон, тус өдөр хэлэлцэн шүүгдэгч С-ийг Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2-т заасан хуурч, цахим хэрэгсэл ашиглаж, зохиомол байдлыг зориудаар бий болгож, бодит байдлыг нуух замаар бусдыг төөрөгдөлд оруулж эзэмшигч, өмчлөгчийн эд хөрөнгийг үргэлжилсэн үйлдлээр шилжүүлэн авсан залилах гэмт хэргийг бусдад их хэмжээний хохирол учруулж үйлдсэн гэм буруутайд тооцож, гэмт хэргийн улмаас нэр бүхий 100 хохирогчид нийт 98,760,000 төгрөгийн хохирол учирсан, үүнээс төлөгдөөгүй буюу шүүгдэгчээс гаргуулбал зохих хохирлыг 83,560,000 төгрөгөөр тогтоож нэр бүхий хохирогч нарт олгохоор шийдвэрлэв.
Шүүгдэгч, түүний өмгөөлөгч нараас гэмт хэргийн улмаас учирсан хохирлыг нөхөн төлөх ажлын 5 хоногийн завсарлага авах хүсэлт гаргасныг шүүх талуудын саналыг үндэслэн хүлээн авлаа.
Эрүүгийн хэрэг хянан шийдвэрлэх тухай хуулийн 34.1 дүгээр зүйлийн 3 дахь хэсэгт “Шүүгдэгчийн үйлдсэн гэмт хэргийн улмаас учирсан хохирлыг нөхөн төлөх талаар гаргасан шүүгдэгч, түүний хууль ёсны төлөөлөгч, өмгөөлөгчийн санал, хүсэлтийг үндэслэн шүүх хуралдааныг завсарлуулж болно” гэж,
5 дахь хэсэгт “Энэ зүйлийн 3 дахь хэсэгт заасан үндэслэлээр шүүх хуралдаан завсарлах тохиолдолд завсарлах хугацаа ажлын 5 өдрөөс хэтэрч болохгүй” гэж тус тус заасныг үндэслэн тус шүүх хуралдааныг 2025 оны 9 дүгээр сарын 25-ны өдрийн 12 цаг 00 минут хүртэл завсарлуулсан болно.
Тоймыг бэлтгэсэн: Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхийн шүүгч Л.Баатар