Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхийн Тамгын газрын дэргэдэх “Ахмадын салбар зөвлөл”-ийн ахмад гишүүд болох
Л.Оюунчимэг, Х.Алтанцэцэг, П.Батбаатар, Ж.Нарантуяа, Г.Нарантуяа, Н.Чулуунбаатар нар 2025 оны 6 дугаар сарын 26, 27-ны өдрүүдэд ҮЦХ-ээс зохион байгуулсан “Ногоон санаачилга–2025” туршлага судалгааны өдөрлөгт уригдан амжилттай оролцлоо.
Тус өдөрлөгийн хүрээнд Япон улсаас Монгол Улсын Соёлын элч Сато Норико, Японы Хоккайдо мужийн ой судлаач, доктор Сато Такао, ОХУ-ын Эрхүүгийн Их сургуулийн Ботаникийн хүрээлэнгийн дарга С.В.Сизых, мөн сургуулийн Биологи, хөрс судлалын факультетын Ботаникийн цэцэрлэгийн агрономич Т.Л.Якушева нар оролцож, дараах сэдвүүдээр сургалт зохион байгууллаа. Үүнд:
• Ногоон байгууламжийг хэрхэн бүтээх
• Модлог болон бутлаг төрлийн ургамал тарих арга зүй
• Модыг олноор тарьж ургуулах арга туршлагууд
• Тасалгааны цэцэг болон нэг наст цэцгийг тарьж ургуулах, арчлах арга
• Мод сөөгний төрөл зүйлийг сонгон тохижилтод ашиглах
• Зүлэг тарих, тарьц суулгац бэлтгэх, хадгалах, арчлах арга зүй
Сургалтын дараа сургагч багш нар өөрсдийн авч ирсэн модлог ургамал, Сакура цэцгийг оролцогчидтой хамтран ҮЦХ-ийн талбайд тарьж, бидэнд дадлага хийх боломж олгосон юм.
Мөн Япон багш нар сургалтад оролцсон ахмадуудад Монголын хөрсөнд тэсвэртэй Сакура цэцгийн үр бэлэглэсэн бөгөөд манай гишүүд уг үрийг хашаандаа тарихаар сэтгэл өндөр буцсан болно.
Ийнхүү хоёр өдрийн турш үр дүнтэй, мэдлэг олгосон “Ногоон санаачилга–2025” арга хэмжээ амжилттай зохион байгуулагдаж, бид бүхэн олон шинэ санаа, туршлага, итгэл урам зоригтойгоор арга хэмжээг өндөрлүүллээ.
Мөн “Ногоон санаачилга–2025” туршлага судалгааны өдөрлөгт идэвхтэй оролцсон ахмад гишүүдийн оролцоог өндрөөр үнэлж, ҮЦХ-ийн Захиргаанаас бидэнд “Батламж” гардуулсан бөгөөд энэхүү үнэлэмж нь бидний цаашдын идэвхтэй үйл ажиллагаанд урам зориг өгсөн чухал үйл явдал боллоо.
Өдөрлөгийн үйл ажиллагаанд идэвх, зүтгэлтэй оролцсон нийт гишүүддээ талархал илэрхийлж, байгаль орчны төлөөх санаачилгад цаашид ч манлайлан оролцохыг хүсэн ерөөе.
Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхийн Тамгын газрын дэргэдэх “Ахмадын салбар зөвлөл”
