Монгол Улсын Шүүхийн ерөнхий зөвлөлийн 2022 оны 01 дүгээр сарын 06-ны өдрийн хуралдаанаас тус зөвлөлийн гүйцэтгэх нарийн бичгийн даргаар Рагчаагийн Батрагчааг томилсон.

          Рагчаагийн Батрагчаа нь 1995-1999 онд “Отгонтэнгэр” Их Сургууль, Олон улсын эрх зүйч /бакалавр/, 2000-2002 онд МУИС-ийн Хууль зүйн сургууль, Хууль зүйн магистр, 2004-2005 онд Их Британийн Нью Коллеж Ноттингам, Өмгөөллийн 6-р шатны дээд курс, 2008-2009 онд Удирдлагын академи, Төрийн удирдлагын менежмент /диплом/ тус тус дүүргэсэн.

        Тэрбээр 1999-2000 онд Сэлэнгэ аймгийн Зүүнхараа дахь Сум дундын прокурорын газарт хяналтын прокурор, 2001-2003 онд “Түшээ” ХЗДС-д Эрх зүйн тэнхимийн багш, 2005-2006 онд Их Британийн Берримен хуулийн фирмд туслах хуульч, 2007-2008 “Датамо” ХХК болон “Кью Жи Экс Монгол” ХХК-д хуульч, 2008-2009 онд “Монголиан энд Глобал Лоёорс” хуулийн фирмийн гүйцэтгэх захирал, хуульч, 2010-2014 онд “Эй энд Эй Глобал” хуулийн фирмийн захирал, өмгөөлөгч, 2012 оноос “Jessup Cup” шүүхийн мэтгэлцээний дэлхийн аварга шалгаруулах тэмцээнд шүүгч, 2013-2016 онд Өмгөөллийн Эй энд Эй Партнерс хуулийн фирмийн захирал, өмгөөлөгч, 2016-2019 онд Төрийн орон сууцны корпораци ТӨҮГ-ын Захиргаа, санхүүгийн газрын дарга, 2019-2020 онд Нийслэлийн засаг даргын тамгын газрын дарга, 2020-2022 онд Эрчим хүчний яамны Төрийн захиргааны удирдлагын газрын дарга, 2022 оны 01 дүгээр сарын 06-ны өдрөөс Шүүхийн ерөнхий зөвлөлийн Гүйцэтгэх нарийн бичгийн даргаар томилогдон ажиллаж байна.  

        Монгол Улсын Шүүхийн ерөнхий зөвлөлийн Гүйцэтгэх нарийн бичгийн даргаар сонгогдсон Рагчаагийн Батрагчааг хүлээн авах хүндэтгэлийн арга хэмжээ өнөөдөр /2022.01.07/ боллоо.

        Хүндэтгэтгэлийн арга хэмжээний эхэнд Шүүхийн ерөнхий зөвлөлийн дарга Д.Зүмбэрэллхам Гүйцэтгэх нарийн бичгийн даргыг томилсон Шүүхийн ерөнхий зөвлөлийн тогтоолыг уншиж сонсгосон бөгөөд шинээр томилогдсон гүйцэтгэх нарийн бичгийн даргад Шүүхийн ерөнхий зөвлөлийн Ажлын албаны санхүүгийн тамгыг хүлээлгэн өгч, ажилд нь амжилт хүслээ.