Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүхийн Тамгын газраас хорихоос өөр төрлийн ял шийтгүүлсэн этгээдийг харьяа Шүүхийн шийдвэр гүйцэтгэх байгууллагад хуулийн хугацаанд хүргүүлэх, ял эдлүүлэх ажиллагааны хяналтыг сайжруулах үүднээс Баянгол, Хан-Уул, Сонгинохайрхан дүүргийн прокурорын газар болон Нийслэлийн Шүүхийн шийдвэр гүйцэтгэх байгууллагатай 2025 оны 6 дугаар сарын 09-ний өдөр хамтарсан уулзалт, хэлэлцүүлэг зохион байгууллаа.
Тус уулзалтаар шүүхийн тамгын газраас 2017-2024 онд хорихоос өөр төрлийн ялаар шийтгүүлж шүүхийн шатнаас оргон зайлсан 812 этгээдийн шийдвэрийн биелэлтийг хангуулах талаар Улсын дээд шүүхэд 1, Шүүхийн ерөнхий зөвлөлд 2, Нийслэлийн шүүхийн шийдвэр гүйцэтгэх газарт 13, Нийслэлийн дүүргийн прокурорын газруудад 7 удаа албан бичиг хүргүүлэн 3 удаа ял эдлүүлэх ажиллагаанд хяналт тавих прокурорын удирдлагатай уулзалт зохион байгуулснаар дээрх этгээдүүдийн шийтгэх тогтоол, гүйцэтгэх хуудсыг Нийслэлийн шүүхийн шийдвэр гүйцэтгэх газарт хүргүүлэн ажилласан талаар танилцуулга, мэдээлэл хийв.
Мөн шүүхийн шийдвэр, гүйцэтгэх баримт бичгийг Нийслэлийн шүүхийн шийдвэр гүйцэтгэх газарт хүргүүлэхэд гарч буй хүндрэл бэрхшээл, ялын биелэлтийн хяналтыг хэрхэн хэрэгжүүлэх, цаашид хамтран хэрэгжүүлэх арга хэмжээний талаар ярилцаж нэгдсэн үр дүнд хүрэв.
Уулзалтын үр дүнд:
1. Хорихоос өөр төрлийн ялаар шийтгүүлсэн ялтны хүчин төгөлдөр шийдвэрийг Эрүүгийн хэрэг хянан шийдвэрлэх тухай хуулийн 37.4 дэх хэсэг, Шүүхийн шийдвэр гүйцэтгэх тухай хуулийн 6 дугаар зүйлийн 6.5 дахь хэсэгт зааснаар гүйцэтгэх баримт бичиг бичихгүй хүргүүлэх
2. Шүүхийн шийдвэр гүйцэтгэх тухай хуулийн 6 дугаар зүйлийн 6.2.1 дэх хэсэгт зааснаар эрүүгийн хэргийн хамт иргэний нэхэмжлэлийг /хохирол/ шийдвэрлэсэн тохиолдолд гүйцэтгэх хуудас бичиж, шийтгэх тогтоолын хамт хүргүүлэх
3. Хорихоос өөр төрлийн ял шийтгүүлсэн этгээдэд оногдуулсан ялын биелэлтийн хяналтыг сайжруулах зорилгоор тус 3 байгууллагын дунд “нэгдсэн систем”-ыг шинээр нэвтрүүлэхээр болов.
Нэгдсэн систем нь ялтныг ял завшуулахгүй байх, гүйцэтгэх баримт бичгийн хуулийн хугацаа хэтрэхгүй байх, сар бүр тайлан, судалгаа гаргах зэрэг ач холбогдол өндөртэй бөгөөд “Шүүхийн шатны ажиллагаа”, “Шийдвэр гүйцэтгэх байгууллагын ажиллагаа” “Прокурорын хяналт” гэсэн үндсэн 3 хэсгээс бүрдэх юм.
Хамтарсан уулзалт, хэлэлцүүлэг үр дүнтэй болж хуулийн хэрэгжилтийг хангаж, системийг хэрэгжүүлэхээр нэгдсэн дүгнэлтэд хүрч өндөрлөлөө.
БАЯНГОЛ, ХАН-УУЛ, СОНГИНОХАЙРХАН ДҮҮРГИЙН ЭРҮҮГИЙН ХЭРГИЙН АНХАН ШАТНЫ ТОЙРГИЙН ШҮҮХИЙН ТАМГЫН ГАЗАР
